سنين واقف على العتبات بقلم الشاعر : على عبد العزيز

سنين واقف على العتبه
وباستنى يا باب الخلق
تفتحلى
أزور السيده الطاهره
وأقيد الشمع فى مقامها
واستسمحها تقبلنى
أكون واحد من المحاسيب
ولو تقبل
أعبى دموعى فى القربه
واطوف أروى الحكاوى سبيل
عن العشاق والشهداء والمجاذيب
وبل الريق يفكرنى
بعطش الورد
يوم البغى ساد سيفه
فصار العطر أيقونه
تقيد السكه وتنور
دروب مليان بالعشاق

ـــــــــــ
من ديوانى(آخر حدود الوطن)
***
زوروا موقعى :
http://aliabdalazez1.blogspot.com