قضية وله حكاية وله موال بصراحة جوعان ومش لاقى أكل وبحمل جوال ولما بيجوا أصحابي بضيفهم شيشا وبلبس أحسن من وزير ولما بروح على الجامعة بحط جل" شوفيني يا بنت خالتي " ولما تيجى المحاضرة بكون زهقان بقول لأصحابي تعالوا نروح على الكافي نشرب شيشا

أصلوا أنا ما نمت كويس كنت سهران على روتانا أفلام بصراحة ما كان عجبني الفيلم بس أنا كنت قرفان بس شو أسوى بهالبلد ما فيها شي بفتح النفس، أبويه أبصر من وين بدبر مصاريف الجامعة وأنا حامل همه ،ما فيش رواتب إلا انو أنا ما بستغني لا عن الجل ولا الشيشا والجوال هدوال حياتي.

معيش فلوس بس مكيف مره بتدبر وعشره لا ، بصراحة عايش ومش عايش بطلع على التلفزيون وبفتح النت بلاقي بنات برقصوا وناس عايشه وبتسافر وإحنا حتى ما عنا مدينة ملاهي زى الناس والخلق ، مرة بحكيلي صاحبي تعال تنروح على حديقة الحيوان قلتله هو فيه عنا حديقة حيوان قلى آه فيها أسد قلنا بالله بنروح بس أنت بتدفع الحساب أصلوا مفلس هالسنة ، دخلنا حديقة الحيوان بصراحة ما شوفت شي غير أكم من عصفور وجمل وقط ملون وحصان علشان أكون صادق.

القضية بعد ما نخرج وين راح أروح وأنا بقول ومقتنع انه ما فيه عيشه بهالبلد وانه أنا الصح وبس ، والحق على الحكومة وعلى الناس،وما في حدي مقدر مين أنا ، بفكر دايما بالهجرة سبيل للوصول للثروة وأتزوج بنت أجنبيه واخذ الجنسية واركب احلي عربية يعنى " سيارة يا محترم " ويكون عندي بيت" مجرد أحلام " سامحوني بس ما بقي للشباب إلا الأحلام .

عارفين مين أنا بكون ؟

……..

…..

أنا الفلسطيني !!!!!!

بدى منك ما تتعجب وتسال نفسك ليش إحنا وصلنا لهيك مرحلة ؟

ليش بمسك جوال وأنا جوعان ؟

ليش الشيشا صارت عادة عنا ؟

ليش نسبة الشباب في المجتمع الفلسطيني عالية وما بنستغل قدراتها ؟

وين أنا لما بدى أتخرج وين راح أروح ؟

ليش أنا بضيع نص ساعة وأنا بحط جل وما مستعد اخدم بلدي لو دقيقة؟

شو اللي صار نسينا قضيتنا وبنتذكر روتانا صرنا دخيل عليكوا أنا.

اقفوا يا شباب امنعوا اللي بصير في هالبلد شوفوا شو بصير تحت المسجد الاقصي شوفوا شو محتاجه هالبلد، اجتهد واعمل وستكافأ، ولا تنسى انك فلسطيني عربيه الأصل.

للمراسلة

[email protected]