أمانة لو قابلت زياد ودرويش وسميح
ما تكسرشي قلبهم، بالكلام المر الصريح
وقولهم، ان العرب اتوحدوا ، وحرروا فلسطين
وان الصهاينة مروحين،بين قتيل وجريح
،،
اياك تقول العدو شارك الغفر على معيز البلاد
ولا إننا بنتخانق، مين ينول الرحمة من بين العباد
أو هل يجوز السلام بالإيد،ومين شهيد،ومين وقيد النار ومقاميع الحديد؟
وبلاش تقول لسه العبيد،بيعشقوا العبودية،بكل عناد
،،
أمانة، ما تحبطهومش،دول مهما كانوا بُعاد
قول المطرودين رجعوا، والعدل عم وساد
والإنسانية اتطورت والاحتلال مجرد ذكريات
كل البشر ع الأرض صبحوا إخوات،والامريكان ع الحياد
،،
اياك تقول العدو بنى سد فوق هضبة الأحباش
أو إن أهل القدس لسه بينادوا على عرب أوباش
إياك تقول، ان الخضوع عم الخريطة وكل البلاد طبعت
واسرائيل ضبعت،وبتاخد الغاز والمية، هدية ببلاش

،،
أمانه يا "مظفر" ما تقولش شعر هناك وتبَكي من ماتوا
سيب اللي مات عايش بعيد عن الهم منتشي بحياته
سيب اللى مات مرتاح من منظر الدم ف مخيمات اللاجئين
وقول لكل الشعرا الراحلين،واحد مصدق شعركم، باعت لكم تحياته.