بنت الربيع الاخضر... شعر: سمير الأمير
تاريخ النشر : 2020-10-15
بنت الربيع الاخضر... شعر: سمير الأمير


بنت الربيع الاخصر
..

انا ف الخريف
بنت الربيع الاخضر بتوحشني
زي الحياة ما بتوحش الاموات
زي البذور ف السنبلات
ماتنتفض وتحن
و امتي كان للنهار فرحه
من غير بكا ف الليل؟
وامتي كان الاشتياق بالسن !!

وانا مش اسير ف السنبلة لحزني
لكن أسير الحلم بالانبات
سكناني شهوة نبات
مشتاق لميه وطين
عدت عليه المواسم
ولسه مستني...
ساكن في قلب الحنين
مشعوف قوي بالغنا
ولبكره بيغني

من قبل خلق الكون
كل الميلاد كان سكون
سر القيامه جنون..
شاف الإله شكلنا ف الحلم فاستبشر
وكان مطر
وكان شجر اخضر
وكان خلقنا بكن فيكون
وكان آدم وكان حوا
وكان ولاد كتير وبنات
وانا ف الخريف
بنت الربيع الاخضر بتوحشني
زي الحياة ما بتوحش اﻷموات.
.......
سمير الأمير
من ديوان" تفاصيل حلم ما كملشي"..الهيئة المصرية العامة للكتاب.