أقبلت ( عادل بن مليح الأنصاري)

أقبلت من بعد غيبة سنين
في نفس الركن قدامي
ودفتر
أذكره أخضر
وقلم كان واحد من أقلامي
قلم ذهبي ثمين؟
يمكن ما طالعتني
بس حسيت في عيونها
باقي حنين
يا قلم احكي لي
كيف مضت أيامك
معاها بدوني

كانت تضحك في نفس المكان
وترسم عيوني
وتمر السنين
وعيونها نسيوني
ما حاولت تناظر مكاني
آه ياقلم لو تلتفت
ودي تشوف فنجان قهوتها
لساتني أطلبه مثل ماهو
وسط لا هو مرار ولا هو حلو
في اليمين ملعقة
وفي اليسار منديل

كانت تشرب من القهوه قليل
تبتسم وتميل
وتقول
رغوة القهوه مثل لون عينك
حنونه مثل لمسة ايدينك
نكهتها مثل نكهة شفاتك
تاخذني لعالم بعيد
نكهة خلطها القدر
من حياتي وحياتك
ليه ما تلتفت
ليه ما تشوف

أنا وفنجان قهوتها
وأيام تصرخ بخوف
والقلم بيدينك
ينزف حروف
اتخيل إنك تناجيني
جيتي بنفس المكان ما نسيتني
أنا جالس وراك
حتى الكراسي ما ملت نداك
تحركت وكلي تحرك معاها
وقفت طالعتني

وما كنني موجود
أشرت لرجّال جاها
مسكت ايدينه ومشيت
وثلاث أولاد جريو وراها