زجل
مَاتْ عَوْدِي .... يَحْيَى عَوْدِي
*****
غْرِيبْ فَالنْوَالَةْ
نَحْكِي
مَنْ طِيبْ لَمْعَانِي
عَوْدِي لَمْسَرَّجْ
بَرْكِي
يَهْزَلْ كُلْ لِيلَةْ
*****
مْقَدَّمْ الْخَيَّالَةْ
كَنْزِي
عْلَامْ وَعْلَالِي
الصَّرْبَةْ فْحَافَرْ
عَوْدِي
لْسَانْ كُلْ قْبِيلَةْ
*****
نَخْوَةْ وَفْهَامَةْ
يَبْغِي
لَا لْجَامْ لَا حَاضِي
شْجَاعَةْ وَقْدَامَةْ
عَوْدِي
مَاتْرَوْضُو صْرِيمَةْ
*****
هَجْمَةْ غَدَّارَةْ
تَسْبِي
أَرْضِي فَعْوَافِي
رَقَّاصْ وْخَوَنَةْ
غْدَرْنِي
سَرْقُوهْ بَالْحِيلَةْ
*****
جَرُّوهْ الْعَسَّاسَةْ
عَوْدِي
رَاسُو فَالْعَالِي
سَارَحْ فَقْمَامَةْ
يَمْشِي
فَسْلَاسَلْ ثْقِيلَةْ
*****
بَالسْيَاطْ الْخَيَّالَةْ
تَجْرِي
الْبَارُودْ فَالْعَالِي
وَالْخَيْلْ سَقْمَانَةْ
تَرْثِي
لَمَّاسَمْ الذْلِيلَةْ
*****
فْلِيلَةْ شَعْبَانَةْ
عَوْدِي
زَعْفَانْ عْلَى الْوَالِي
عِيشْتَكْ قَرْفَانَةْ
سْرَقْتِي
حْكَرْتِي لَقْبِيلَةْ
*****
الرَّقَاصْ وَالْخَوَنَةْ
فْأَرْضِي
يْحَكْمُوا بْلَا
قَاضِي
عَوْدِي فِي سْلَاسَلْ
مَكْسِي
مَعْصُوبْ لَعْوِينَةْ
*****
خَبْرُوهْ فِي كْيَاسَةْ
عَوْدِي
الْبَرْدْعَةْ وَالشْوَارِي
أَوْ خَادَمْ الرْيَاسَةْ
مَنْسِي
فَقْصُورْ لَمْدِينَةْ
*****
جَاوَبْ الْخَمَّاسَةْ
عَوْدِي
الْخَيْلْ وَالنْوَاصِي
المُوتْ وَلَا التْرَاسَةْ
فْأَرْضِي
وْأَنَا سَيَّدْ لَقْبِيلَةْ
*****
حَكْمُوهْ فَالرْبَاطَةْ
يَقْضِي
الْعُمْرْ لِي بَاقِي
مَاتْ بَعْدْ فَقْصَةْ
عَوْدِي
وْثَارَتْ لَقْبِيلَةْ
*****
الْعَلَمِي فِي سْلَاسَةْ
نْظَمْهَا
الشَّمْعَةْ فَقْيَاسِي
غَفْرَانْ وَكْرَامَةْ
نَرْجَى
رَبِّي لِي رْحِيمَةْ
مَاتْ عَوْدِي
يَحْيَى عَوْدِي
زجل المنونى عبد الجبارالعلمى
مَاتْ عَوْدِي.. يَحْيَى عَوْدِي بقلم:عبد الجبار المنوني
تاريخ النشر : 2019-10-05