اغاني مهرجانات عاديه بقلم: حسام العقدة
تاريخ النشر : 2018-04-14
انا دلوقتي قاعد في البلكونه
باشرب شاي..
سرحان في الملكوت.. العصريّه
مش ناوي اكتب اشعار لحبيبتي
ولا ناوي اعمل تمثال..
يِظهر تفاصيل دراعاتها
ويفكرني بملامحها
مش عايز أبقى "سيزيف" تاني..
قاعد أشرب شاي..
ونسيت كل تاريخي
ومش عايز افكر في الأيام الجايّه
يبقى جنون..
لو هافضل على طول مجنون!
جاهز للإستسلام للنوم أي دقيقه
على كتف الخضره..
مستسلم للشبوره
اللي محاوطه عينيّه
ولشجر اللبلاب الطالع..
على كتفي.. وبيلف على رقابتي
مستسلم لأغاني المهرجانات..
مش فاكر بالظبط..
اذا كان عندي..
حبيبه وحيده.. ولّا كتير
مش فاكر بالظبط.. اذا كان عندي
قصة حُب.. ولا اكتر؟!
مش قادر اميّز..
اذا كان اللي ف عيني ده نوم
ولّا الموت
حاسس إنّي
اخيراً ممكن افارق ضلّي
بعد ما جناحاتي..
بدأت تكبر واحده بواحده ف كتفي
متخيل إني هاطير أول مرّه..
زي حمام الزاجل..
وارجع للوطن الأصلي.
..................
شعر: حسام العقدة