حزن خريويش حزنا شديدا بسبب فهمه الخاطىء وظنونه بأنه سيشارك في مؤتمر فتح وذهب إلى صديقه منصور ليشكو له ويبكي على أطلال حلمه الذي لم يكتمل .
- الله يصبحك بالخير يا منصور .
- صباح فتح الجميل يا خريويش . أنا عرفت اللي صار معك بس لا تزعل.
- مش زعلان بس مقهور لانه كنت حابب اشارك .
- يا خريويش شاركت ولا ما شاركت فتح بخير .
-ان شالله بس انت مش شايف شو بصير؟
- شايف وسامع هدول يا خريويش مثل ورد النرجس ! 
- شو يعني ؟
- هدول يا خريويش شخصيات سلوكياتهم مربوطة بجنزير وفكروا انو ما في غيرهم ف هادي الدنيا!
- اها في منهم كثير! وقاعدين بكثروا وبفكروا ان الحياة بدونهم رح تنتهي!
- بالضبط حبيبي خريويش ومنشغلين دايما بالخيال وبالسلطة والسيطرة وبالمميزات والغيرة!
- طيب شو بدهم بالضبط؟
- بدهم يكونوا في اول صف واذا شكوا انو الصف مش واسعهم بحطوا العيب في الموجيدين !
- والحين يا منصور وبعدين مهم؟
- لازم نخليهم على راحتهم لانو اذا اعطيناهم اهتمام بصدقوا !
-انت مش شايف انهم خونو 1400 واحد اختارهم الالاف يعني الالاف خونة برضو !
- يا خريويش سيبك منهم حتى سيبك من اللي عرف انو ما الو سكة راح اعلن انو ما رح يشارك!
- اه صحيح وهادا شومالو ؟
- هادا يا خريويش صدق حاله ! بس مش مطولة رح يصحا من نومه !
- والحل يا منصور؟
- الحل يا خريويش انو الخونة على رأي النرجسيين والخونة اللي وراهم لازم يكون الهم رد قوي.
- كيف يعني يا منصور؟
- يعني لازم يثبتوا انو الحق معهم وانو فتح كويسة وموحدة ويوخذو قرارات مهمة.
- بتعرف يا منصور أنا بدي اروح على المؤتمر واقول الهم هادا الحكي.
- بعدين معك يا خريويش كيف بدك تدخل عالمؤتمر وانت مش عضو؟
- عندي طريقة وبدي أحاول !
- أي طريقة صعب يا خريويش!
- لا بدي احاول يا منصور!
- يخرب شرك يا خريويش وشر النرجسييين كلهم . 
- لا يا منصور لهون وبكفي بدي ادخل عالمؤتمر واقول لابومازن هادا الحكي .
- ولك كيف يا خريويش.
- اجتني فكرة ! 
- شو...؟
- بوصل على البوابة وبعدين بدخل بظهري والحراس بفكروني طالع مش داخل وهيك بظل داخل!

# وفائي للوطن لا يعني إما أن أكون أو لا يكون الوطن ! لهون وبكفي ...عيب !