ابقى قابلني ( شعر بالعامية المصرية )

ناموا
ناموا
صحيوا كان الصبح فايتهم
إيه الفايدة ... صحيوا و قاموا
صاح الديك و لا حدش سمعه
فوق بحر استعباطهم عاموا
نام يا أخونا ... عيش و اتمتع
سيب السايب لو يتمطع
إيه راح تاخد
لو جيت يوم و مسكت لجامه
وَدّي الواد لأبوه .. لو أنكر
ودّي الواد على طول لعمامه
ودي الواد لأبوه مش أحسن
هوّ الأولى يحوش إجرامه
ودي الواد على طول أمريكا
هي العارفة حلاله و هي ّ
طبعا عارفة أكيد بحرامه
ادخل جوا زمامك و اسكت
اوعاك تدخل جُوَّا زمامه
انت يا دوب تقعد وتمصمص
فين الماضي و فين أيامه
خليك عايش فيه ع الآخر
وافضل ماسك ديل أحلامه
افضل كدا مستني لبكرة
أي سراب ارمح قدّامه
لو في عروقك دم هايفضل
ابقى قابلني لو يوم قاموا
ناموا
ناموا