( استراحة )
امنحوني من ساعات الوقت
لحظة ...
أعترف فيها بحاجات
إني حاسس جيت غلط
وإن مش نفس البداية
ابتديتها ...
وبإرادتي ها تنتهي
بطّلوا تبصوا لعينيّا
هي فُرجة إنما
لونها حلو ...
كل شيء جوّايا
حلو ... إنما
لوّنوه بالسّواد
كان ميعادي مع الحياة
كان ميلادي ملوش وجود
لحظة واحدة ..
متبصوليش من فضلكم
كوني بسكت
مش رضا عن حياتي
كوني بسمع الكلام
مِش مُطيع !!
ربّطوا كل السلاسل
واحدفوا بعزم الإرادة
في القلوب مشكلات
مش في استطاعتي
إني أوقف إحساساتكم
أو أعاني من سُكاتكم
ردّدوا كل الكلام
وبدون لسان !
اخرسوا ...
سكّتوا كل السُّكات
المطالبة بالحقوق
مش كفاية ...
المهم إن الحياة تكون كما
يرسموها الأذكياء
محتاجين للسان !!
لاء ..
مش محتاجينه !!
ممكن تقول كلام كتير
ممكن تقول ...
تحت أمرك
وبدون لسان
الخلاصة ...
هافتكر نظرات عينيكوا
كل لحظة بقوله فيها
تحت أمرك !!
لن يضرك ...
وأنا لسه برضه
تحت أمرك ...

( تمت )
شعر د. ميرفت سعد