لَمّا انكسر مجدافي

بعد ما قَرب البعيد
ألاقيه بعيد تاني
بعد ما قَرب الحبيب
ألاقيه ينساني
بعد ما قُلت الشمس طلعت
ألاقي الظلمة وخداني

***
تُهت في بحور غضبانة
بعد ما انكسر مجدافي
الموج عليَّا عِليّ
بعد ما كان البحر صافي
السفاين تفوت
شايفه مجدافي
ده أنا كُنت دليلكم
والخِل مِجافي
***
مَعتبش عليك يا زمن
أعتب على حالي
ده اللي حبيتهم
جرحوني ليالي
خَدوا مركبي
سابوني وحداني

***
يا دُنيا بتضحكي
ولا أنا زليت
من كاسك المُر
يا ما ارتويت
أجري لبرك
تُجريني لبحرك
قدري كده
بمركبي تايه
ما رَسيت

"عبدالقادر فرج الله "
الإسماعيلية 7 / 8 / 1986م
من ديوان زهرة اللوز