ضاع منُّهْ أمانه
واحشاني الكلمة الطازة وانتي بتدعيلي
واحشاني البسمة
لمَّا تطبقي منديلي
وف عرق العافية تدوِّب كل خيطانه
واحشاني اللمَّة حواليكي
والبيت بتزغرط جدرانه
وواحشني الأكل المتلهلب
من صنع إيديكي
وبرام الرز المتعمر والمحشي حمام
ومشلتت في الفرن يفحفح
وكانونك ما يطير دخَّانه
البيت من غيرك والله
ضاع منُّه أمانه
واحشاني يا أمِّي ومش عارف
على أيه هحكيلك
واحشاني اللمسة من إيدك
وانتي بترقيني
من عين الحاسد والحاقد
وعنيه الصفرا التلاويني
وتحطي سياجي بدعاكي
وتختمي قرآنه
البيت من غيرك والله
ضاع منُّه أمانه
واحشاني يا أمي وف عيدك
ببعت سلامات
والشوق للقاكي خلاني
ضمن الأموات
ومصبَّر قلبي لفراقك
بعض الدعوات
بذكرها تملِّي ف صلواتي
وابعت رحمات
يجمعني إلهي ويَّاكي
ف أحلى الجنَّات
والنص بيهرب من ايدي
واختل ميزانه
البيت من غيرك والله
ضاع منُّه أمانه
سامح لطف الله