مش ابن جنّـيّه !!

لو مصر غالية عليك هتقوم وتبنيها
وتبقى فيها الشمس وقمر في لياليها
وتكون ثمر للشجر ونسيم لضواحيها
وتصلح اللي انكسر وبجد تحميها

أوعى تكون الشقي اللي حياته بلاش
ناكر جميل البلد طول عمره كان غشاش
سارق لخير الوطن واليوم مسك رشاش
ولما قتل ابننا حرّم عليه الشاش

لومصر غالية عليك حافظ عليها بجد
اللي يحب البلد يبني ما عمره يهد
مش جدك اللي مضى هو اللي شاد السد
خليك بقى خلفته واللا الحكاية عند

يا مصر يا حلوتي والله بنحبك
وما نرضى حد يزعلك
ويكون في يوم ضدك

لكن بقى الشيطان ضاحك على شوية
والصح عامله غلط ومعكر الميه
مش هي دي شغلته مش ابن جنيه !!

شعر : جمال خليفة