خطيئة الشمسيه

في يوم حار ، كنا في مطعم نتناول الغداء بجوار جدار المطعم الزجاجي ، و وقفت بجوار الزجاج فتاة جميله و بيدها مظله(شمسية) تتقي بها حر الشمس ، و استرعت انتباهنا فكان المطلع :

مطلع :

ايدك لو لمستني لمس
بحـيا لو كني بالرمس
الله يعين الشـــــمسية
تحتا شمس وفوقا شمس

ابو الحب:

ما بحبا هالشمسية
ضدي بتعمل خطيه
بتحجب عنك حر الشمس
و جمالك عن عينيي

سعيد جبر:

القمر حتى نورو يهل
بدو نور الشمس يطل
مشعشع نورك يا حلوي
تحت الشمسيه و بالظل

ايوب:

لا شمس و لا شمسيه
بشتويه و بصيفيه
شعرك بّوْرد حر الشمس
و دَفـَّا قر الشتويه

زياد:

عملولك الشمسيي
تا تحميكي من الأمطار
احتارو فيكي عينيي
عيونك ليل و انتي نهار

هايل:

شموس الدنيي لو لفو
عقياسك ما بيكفو
جفو كل نهور الكون
و سحر عيونك ما جفو

سامر داغر:

الشمسيي ما الها لزوم
تحملها هالصبيه
بتخبي الخد المحموم
و بغطيها بعينيي

نزار:

يللي سحرتيني بالأمس
و غرقت بيم بحورك
البدر بيعكس نور الشمس
و انتي بتعكسلك نورك

وسيم:

الله يعين الشمسيه
عملنا منها قضيه
بدي عوف الشماسي
و البس بدلا طاقيه

ابو الحب:

الشمسيه عليها تجنيت
ومن سحر الحلوه جنيت
و حتى غني لأحلى عيون
عن عينيي مــــا تخليت

====
قصيد ، ابو الحب:

يا شمسيي بلا فعل النكايه
عني تحجبي الحلوه و حلاها

بايدا حملتـــك بدهــــا حمايه
لبشرتها من الشمس و أذاها

امامي تغندرت بـــدها رعايه
و جمال الوجه خالقـنا عطاها

الخدود مقمره بأطيب عنايه
و عيونا طالبي عيوني دواها

رموش سهام غمزتهارمايه
و حواجب ما بينزل مستواها

حرير الشعر ع كتافا غوايه
خيوط الشمس والهيبه هداها

عنها ما ردت احكي حكايه
الحقيقه بقولها وما في عداها

يا شمسيي ما مرتكبي جنايه
حرمتي العين من رؤية مناها