ضفيره

الهوا عمال بيعافر
يدخل بين الخصله
وبين التانيه
مش عارف
كل الخصلات معقوده
مشدوده
مربوطه بالحبل الأخرس
مكتوم النفس الواقع فيها
داخله الخصله ولفه حوالين التانيه
وجايه التالته تتعشق فيهم
صوابع البنت عماله تشد
وتلوى
وتعصر
قلب عروقه ف بعض
الأولى .. التانيه .. التالته
الأولى ..
بتجض الخصلات
بتضغط بكفوفها عليهم
وبتتنى الطول
وبتربط من فوق بالحبل
تتنهد كل الخصلات
وبتركن ع الكتف
الباصص ليها
عمّاله بتتلوى
التيار بيعافر فيها
بتعافر تخرج من بعضيها
لكن ..
البنت حطت تعصيبه عليهم
من تحت الراس عقدتها
كبشت فى الخصلات
خبتها
دفستها
* * *
قفلت بابها
كنست كل غريب ع الأرض
لمت كل غسيل الحبل
كنست كل تراب الحيط
عماله تسعّف سقف البيت
خصلاتها تئن
تشد الحرده
وتحزم ف التعصيبه
وتواصل كل حاجات البيت
ياعيونها ياريت
تتكحلى
شئ ملعون
مجنون
وياريت
تتحنى
بشوق الليل
وتسهّرى ف الأوتار جواها
كف اليوم فك ستارته
نامت
صحيت
قامت
دارت كما دبور نطاط
لا فرح
لا عياط
ولا حد يفكر
ف الخصلات