الاخوة والاخوات مازلنا مع صفحات كتاب ( العندليب لايغيب ) وفى هذه الحلقة نقدم اليكم :

غنوة العندليب اللى غناها دايما فوق جراحه :

بعد رحيل العندليب عبد الحليم حافظ الى الدار الاخرة قال مجدى نجيب :

نبتدى منين الحكاية ؟

نبتديها م البداية

الالم زى الضباب

يرمى العذاب قدامك

والالم دايما ماغاب

دايما فى احلامك

فى ايامك .. فى انغامك

ويفرد جناحه كل ليلة

فوق كتاف اصحابك

عندليب ومين قدك؟

هفهف على خدك

شراع اخضر بمركب حب

تايه فى السنين

عندليب ومين قدى .. ياسعدى

مطرح خطاوى الالم

يطرح غنا وردى

ودمعة كما الموجة

اللى بتغنى على الناى الحزين

قوللى حاجة .. اى حاجة

فى البحر برمى كل ليلة دموعى

ترجع لى فى ضلوعى

( موعود ) بالحياة دايما تدوس ليه

فى ليل الفرحة كل شموعى

قوللى حاجة .. اى حاجة ؟

الرد كان اصعب من الصمت

كان نايم ممدد على كتاف الجرايد

كان خبر مرسوم

وكان الحرف متوتر وشارد

راحت الدمعة تدور عن صحاب ليها

تاهت فى لياليها

واتحزمت احزان صبية

واترنحت وردة فى ايديها

واتوجعت اهه

ورفرفت اهه

فوق سحابة ذكرى فى عنيها

نبتدى منين الحكاية

نبتديها م النهاية ؟

كامل الاوصاف

وكان موصوفلك

جبال م الصبر

زى الهوا

وكان مكتوبلك الام الهجر

موعود

لكن بالالم وحده .. وده بالامر

وتقوللى : اى دمعة حزن لا

اقولك : فى يوم فى شهر فى سنة

لما اسمعك ياعندليب يااسمر

اقول : الله

لكن دايما فى اعماقى

كانت بتجرحنى كتير الاه

ولما اسمعك زمان ودلوقتى

احس بالقلب لاخضر دبيح على كفى

ادوب فى الحب

واتنسم جراح بختى وبختك

سوى احنا البشر مولودين

متعذبين بالنغم

متعودين ع الالم

ولكل شىء فى الحياة بنحبه

ننزف بالجراح .. ونقول نعم

وقال السيد عودة الاطرش :

فجر الربيع ابتسم

والزهر ليه نوح

والغصن الاخضر دبل

ولاعادش يتطوح

وكل عاشق بيمسك

وردة ويلوح

سألت اهل الهوى..

ليه البكا والنوح ؟

ردوا البلابل وقالوا :

العندليب روح .

وقال ايضا :

مسكين يافن الطرب

اخر نجومك غاب

ولاعادش يمشى فى سماك

الا بريق كداب

بعد التلاته اللى كانوا

اخلص الناس

الكوكب اللى اتحجب

والبلبل اللى راح

والعندليب اللى فاتنا

وهو لسه شباب

كان الميعاد فى الربيع

والكل كان على نار

متشوقين للنغم

والفن ليل ونهار

ونسيوا ان الزمن

معاه اسرار

وقالوا : بكره حانسمع اعذب الالحان

وقبل مااللحن يكمل

دابت الاوتار

وقال ايضا :

كانت ليالى الربيع

تحلا بتغريده

ويوم مايسعد قلوبنا

يبقى يوم عيده

وكان بيضحك لنا

ويداوى تنهيده

والجرح كان يؤلمه

واحنا نقول .. الله

وهو يبكى ويمسح دمعته بايده

سافر يداوى الجراح

قبل الربيع مايهل

علشان يعود فى الربيع

يسعد قلوب الكل

ويدى للفن روحه ومهجته مايكل

لكن يعود م السفر

يبدأ سفر اطول

وكل زاده وزواده

عقود من الفل

وقال ايضا :

ياعندليب الطرب

صوتك الحلو

غايب عن ليالينا

ولاعادش غير الصدى

يسرى يبكينا

واحترنا نبكى عليك

والا على روحنا

وانعزى فيك الطرب

والا يعزينا ؟

ياعندليب الطرب

لسه المكان خالى

واسمك اللى ارتفع

لسه مازال عالى

ومين هايقدر يطوله

فى وقتنا الحالى ؟

دا المجد عايز جهود

وكفاح وتضحية

وطالب المجد يدفع له

الثمن غالى

بعدك اغانى الطرب

مااعرفشى راحت فين

والكلمة لونها انخطف

مبقتشى تملا العين

والغنوة صبحت

بتتخبط مابين شطين

وساعة تغرق

وساعة تقب من تانى

ومهما تلمع

بترجع تنطفى فى يومين؟

بكل تأكيد اصالتك

لسه موجوده

وشجرة الفن

لسه جذورها ممدوده

ولسه فاضل اساتذه

بس محدوده

وفيه مواهب كتير

عايزه اللى يرعاها

وفيه قضية

ولسه الجلسة معقودة

وقال الفنان محمود شكوكو عندما رحل العندليب عبد الحليم حافظ :

ياعينى ابكى بدال المع

دم صبيب

ع العندليب

اغلى واعز حبيب

ماكانش ع البال

يفوتنا

وعن عنينا يغيب

فى يوم فى شهر فى سنة

تهدى الجراح وتنام

وجرح قلبى عليك

اطول من الايام

نودعك بالدموع

ونشيعك بالالام

وعمر جرحى عليك

مايخف ولا يطيب

وقال الشاعر محمد بهجت :

انت فين ياعندليب؟

الغنا بقى شىء عجيب

عالشجر سكتوا البلابل

واللى بيغنى لنا ديب

ديب ده ولا ديب فريزر

اعبى من حملة فريزر

بنطلون جينز وبليزر

والكاوتش عليه رهيب

انت فين ياعندليب؟

الكلام الحلو ضايع

والكلام الفاضى شايع

الفنون صبحت بضايع

واللى موش تاجر يخيب

انت فين ياعندليب

والنغم وانت اللى دارى

يشبه الطوب الحرارى

زى عركة فى الحوارى

بالصاجات والقباقيب

انت فين ياعندليب؟

فين كلام الحب واحنا

غنوتك لينا تصالحنا؟

يااعز الناس جارحنا

عصر تبقى فيه غريب

انت فين ياعندليب ؟

وفى عام 2007 كتب الشاعر الكبير عبد الرحمن الابنودى قصيدة طويلة بعنوان (زمن عبد الحليم) قال فيها :

فينك ياعبد الحليم ؟

فين صوتك اللى كان فرح وهموم

اللى طلع من قلبك الشايف

حالف يعيش ويدوم

فى زمن .. فى غدره كريم ؟

فينك ياعبد الحليم ؟

فينك يااحلا من يغنى الفراق

تيجى تغنى زحمة الشهداء

والدم فى فلسطين

وفى لبنان

وعلى توب العراق ؟

الموت صبح ساهل

واحنا اللى نستاهل

ألهنا على روسنا الذليلة

كل شيطان رجيم ؟

فينك ياعبد الحليم ؟

فينك يازارع الحلم

بعد الحلم

بعد الحلم ..

الحلم شارب سم

الدنيا ليل

مكون بريح وغيوم

ولاحد سامع صرخة المظلوم

ولاأنة المهموم

الدنيا منتظرة صوتك

ليه رحلت قوام ؟

ضاقت مساحة الكلام

بساتين من الاحزان

والشوك ..

مازال يوعد بصبحة ورد

الشوك خسيس ..

عمره مايوفى بعهد

الشوك _ كما تعرف _

خبيث .. خوان

كانه فجر اعمى ..

ماشافشى ادان

وكل صبح جديد

بحزن قديم

فينك ياعبد الحليم ؟

ولاعاد حبيب ينضم

ولا عبير ينشم

ولا ضحكة ملو الفم

هربت ليه ياعم ؟

مش كنت تنتظر الليالى الهم

ملونه فلسطين بلون الدم

وتقيم بأحلا صوت صلاة الصبح

حتى لو الامة صلت دون ماواحد

ام ؟

والضحكة .. اناتنا .. اذا تتلم

قابض على الحلم الشهيد .. باليد

وكل مانشد الامل .. ننشد

الكل راحل

والجناح منحول

فى غربة

تقتل قلبنا المقتول

واحل فى صوتك

احلا ماف صوتى

ورحل بموتك ..

احلا مافى موتى

هاربة الحدود

وبيطاردها الحد

الاغتصاب

مالوش حدود ولاحد

كله بيرحل

من دموع الخد

للشهدا

نايمين ع الكتاف فى كل برد وشرد

ابدان ..

بطول حزن الحياة .. تتمد

صوت البيوت الطيبة .. بتتهد

صرخة وليد اخضر

صرخها .. بجد

الطيارات

الحراتات

الجرافات

تقتل تاريخ الارض

والحزن

خيط ضى الاسى الممتد

الحزن صاحب حميم

فينك ياعبد الحليم ؟

فيننا احنا ياعبد الحليم دلوقت ؟

مين اللى قتل التانى فينا ؟

احنا والا الوقت ؟

اقدم مافى متع الحياة

النوم..

وقلة الانتباه

الصمت والصوت

يبقوا شىء واحد

سكت والا نطقت

الكل فى البعد اتنسى صوته

وانا اللى

للصوت القديم .ز اشتقت

ماهوش مرض فيا بحب قديم

فينك ياعبد الحليم؟

فات ايه وامتى وكام ؟

هل لما غنينا الوطن

كنا بنفرش بيه على الرصفان ؟

وناكل الساقطة من الاغصان ؟

نتجاهل النكسة ورا النكسة

ونندغ التواريخ والاحزان

وشيتم الشاتم ..

نقول : ( احسنت ) ..

والامة ..

تدخل

دايرة التحريم ؟

فينك يا عبد الحليم ؟

انا هنا ..

مطرح ما مديت ايد وقلت سلام

فارش ..

في ضلة حيطة الايام

رحلوا الجميع وانا لسه ماشبعت

انتظار

مازلت احلم بالنهار ..

وبفجر اجمل الصغار

ولا عدت افرق وشي عن وشي

انا يا للي كنت مليح

الناس مشردها وشردني

عويل الريح

في وشي تقرا ملامح الامة

الضلمة نور

والنور جبال ضلمة

باهتف وانادي الحق من غير صوت

مهر الفساد ..

وسط السكوت مفلوت

ارواحنا متباعة ..

بتمن القوت

الفقرا ماتوا والعدو بيحكم

كل الجراح ماتئنن

شوقي القديم بيحن

لحبر غير الحبر

وشعر غير الشعر

وسن غير السن

ايه اللي مشاك وسابني

في الزمن ده ائن

وازاي هربت من البلا اللي يجن .

الدنيا من غير ناس

وانا زي ما بتعرف

بارخي لجامي واخدع السياس

فينك ياعبد الحليم

من اللى حيصد اهات الارض

ويبلغ الاحساس ؟

من اللى حيغنى جنوب لبنان ؟

الكدب مالى الكون

الكدب مالوش لون

الكدب .. بلع الالسنة .. والصوت

اما انت ياصوت الحروب والسد

شديت شجون الامة

وتر .. اتشد

وغنوة حزنها جد

مين اللى زرع اللون ده فى الاحزان ؟

مين اللى ردم الامل تحت الهد ؟

مين اللى خان ( يونس )

فى ( خان يونس ) ؟

سؤال .. عليه ..

ماجاوبنى ابدا حد

والشوطة واخدانا رجال وحريم

فينك ياعبد الحليم ؟

الامة حكامها الجداد

يختلفوا عن حكام زمان

بزمان

اللي ماخان

فتح له خان

وورث ابنه الارض والدكان

و البرلمان و القصر و الجورنان

الامة بتعاني و بتعاني

الامةفي دروب الاسى

تاهت

آدي المسيح

شايل صليب تاني

اظنه غير دكهه

دهه .. باهت

عن وصفه

عاجزة كل احزاني

و العدرا

من يوم البكا بتبكي

ولدها مقتول

ع الصليب متكي

كل النسا ياصاحبي في فلسطين

ليها ولاد ماتت

العدرا تبكيهم سوا و تئن

تبكي و تداوي ف صليب الابن

يا ام المسيح

من قعدتك قومي

آدي الصهاينة بيمشوا في دروبي

و قلعوني

و مشيوا بهدومي

و الحزن ..

فـ القلب القديم فاحت

و في العراق

الارض خناقة

الارض غرقت دم يا ولداه

و مسمينها .. فوضي خلافة

شعب العراق ما عادش بيقول آه

و الدم في بغداد

فقد معناه

و فـ كربلاء ..

آدي الشهيد ..محمول

كل العراق ..

زي الحسين مقتول

و الدنيا فاهمه ..

و انا اللي لسه غشيم

فينك يا عبد الحليم ؟

آهو زي ما سبتني

من غير وداع .. و مشيت

صوتك ما عادش

يدق باب البيت

و انا في الحقيقة ..

مش باقول مشتاق

عشان مشتاق

كل الحكاية

في زنقة الاوطان

و ميلة الميزان

لما تخوي حدادي اللوعة

و الغربان ..

كنت انت نافعني

اذا قلت يا فلسطين

او يا جنوب لبنان

او .. يا عراق

او باغني احلامنا

اللي ضاعوا هباء

و كل يوم اوطان

بيغيبوا في الاجواء

يغيب عنا الصوت

و تفضل الاصداء

و قليلة عـ الكلب

قولة لئيم

فينك يا عبد الحليم ؟

فينك يا صاحبي

نشم لحظة نصر

لحظة .. نسيناها زمان

في مصر

ننده ..

نوقف فوقنا شمس الحق

و نخفف الحدة ما بين الاه ..

و بين اللأ

فينك يا عبد الحليم ؟

الفرحة في وشوشنا

و الحزن جوانا

الدم مجاني .. و السكة مجانا

مهما بعد عنا ..

بينام علي سرارينا .. ويانا

الدم لاحمر قاني

اتاريه نسبة ل ( قانا )

و الضربة غرست في الصميم

فينك يا عبد الحليم؟

كتبت سطرين بس كنت حزين

آدي ورقتي لمين ..؟

في زماننا ده - و احنا عاشرنا الحزن

يا قسمني حزني مين؟

فينك تغني تاني ( موال النهار ) ؟

يا صاحب رحلة

في طريق الشوك

انت ما متش

هم شبعوا موت

المسالة .. مش صوت

المسالة هم الجميع يتحضن

تترجم المعاناة .. وطن

المسالة

امتنا .. في التيه .. تفتكر

و تنتفض .. و تعود

تنفض غبار الياس

علي رمل الحدود

نمر من باب الوجود

نعيش جنود

و نموت جنود

نفضح و نهزم العدو اللئيم

نفس العدو

الندل

القديم

كما فعلنا فــ مصر

لاجل النصر

مش ده اللي خلاك

في الضمير

.. عبد الحليم ؟

____________

كتاب : العندليب لايغيب

للكاتب : ابراهيم خليل ابراهيم

رقم الايداع بدار الكتب والوثائق

القومية المصرية 4723/2002