يوميات

شعر: حسام العقدة

دي مش عيشه..
انا قررت أموت
انا دوقت معاك أجمل لحظات عمري
لكن مش قادره أكمّل
لازم أبعد عنّك
انا هاحبس روحي في أوضتي
مش عاوزه أكلّم حد
ياما حلمت..
وياما اتمنيت إنّي أحقق حلمي
ممكن تساعدني أبعد عنّك؟!
وإرجع عيش إنت حياتك
اعتبر إنّك كنت بتحلم!
مش قادره افهم
ازاي اقدر ع البُعد سنين
وانا دلوقتي..
مش قادره ابعد عنّك ساعه!
انا مش باتكلّم عنّك..
انا باتكلّم عن نفسي
عارف..
انا نفسي اتحرّش بيك!
عاوزه افترسك
انا عرفاك مش بتحب الرغي
بس كلامي معاك مش رغي
ده حب
واعترافات..
انت مخبيني جواك طول عمرك
لكن انا..
كنت بادلدق بالحب
كان بيبان في عينيه
اجمل حاجه في العشق
لمّا بيفضل متداري..!