شيزلونج

شعر: حسام العقدة

انا تعبانه..
فعلا محتاجه اتعالج..
مش عارفه اوصفني
حاسّه إن انا مسجونه
ورا قضبان..
مش عارفه اهرب منها
شيفاك قدامي
ومش عارفه اخرج لك..
مع إن اللحظه معاك بحياه
مش هاعرف اعيش..
وانت بعيد عنّي
انا مش هايأس
مش عارفه انا جيبت القوّه منين؟!
احكي لك اقول لك إيه؟!
احكي لك عن حُبي؟!
ولّا عذابي في بُعدك؟!
ولّا احكي لك عن عِزة نفسي
اللي سنين منعتني ارجع لك؟!
بُص.. هاعيّط..
………….
وبجد انا تعبت
ودموعي ملت عيني..
وبقيت مش باتحمّل
عارف..؟
انا كذا شخصيّه في بعض
واحده يتيمه..
وواحده في حضن حبيبها
او ظالمه.. او مظلومه..
او مقهوره..
او زي ما قولت الأول..
مسجونه..
وبتفكّر تكسر قضبانها..
حابّه الحريّه..
واحده ضعيفه.. وواحده قويّه..
كُلنا عندنا شخصيّات مختلفه
لكن مش كلنا بنخاف
تعرف..؟
انا عمري ما كنت اتخيّل نفسي
انّي ابقى معاك
بالشكل اللي انا فيه..!
حاسّه إن انا ويّاك عريانه..
عريانة عقل.. وأفكار
ومشاعر..
او حتى جسد
بص..
انا عارفه إنّي بحبك
لكن بالمنظر ده؟!
عمري ما كنت اتخيّل
مش قادره أخبّي عليك حاجه
او أي مشاعر ليك..
او حتى أكون مكسوفه
انّي اتكلم في حاجات ويّاك
حاجه مش طبيعيّه بجد..!
انّي ابقى معاك بالمنظر ده؟!
مش قادره اتخيّل
بس انت قدرت توصّلني
انّي ابقى معاك عريانه
وياريت قلبي بينطق
كان قال لَك..
انت مرايتي
عارف.. لمّا يكون فيه لوحه سودا
فيها نقطه بلون فاتح..؟
اهو انت الضوء اللي في عمري
تعرف إنّي باحِس ساعات
انّي استاهل الحرق؟!
……….
خلّي بالك من نفسك..