انكسار بقلم:عادل بن مليح

انكسار ( عادل بن مليح )

1

تجي نجلس هنا ؟
والا اقلك بلاش
تعرفين
حلمنا غشاش
يضحك علينا
ينادينا واذا جيناه
ينحاش
2
الغريبة لقيتك
في مدينتنا الكئيبه
كان الكرسي مصدي
والجو حر .. رطوبه
وانتي على كرسي قريبه
والتفت بصعوبه
طاح جوالي بجيبه
3
جات عيونك في عيوني
ارتبكت
ومسحت عَـرق من جبيني
ورجعت
انتظر غروب الشمس
وفي داخلي همس
واحساس
يطاردني من امس
4
إن اليوم غير
وان قلبي يرفرف مثل طير
قلت يالله عسى خير
وساقتني رجولي
عند كرسي مصدّي
رجال ونسوان من جنبي تعدّي
5
وانا لاهي في الغروب
كل حلمي فنجان شاهي
ونسمة هبوب
ويمر الوقت
وانا خايف التفت تكون اختفت
حسبي عليك يا جوال طيح
ودي اناظرها
ودي اصيح
6
تعالي نلحق الليل
تكوني القمر
واكون نجمة سهيل
يا بنت راح وقتي
وانا مشتاق بالحيل
افرش الحلم لعيونك
وارش النجوم في الدلّه
واخلطها مع نكهة البن والهيل
7
ودي اناظر يمين
مرت دقايق كنها سنين
والصدى يخالط انفاسي
يا بنت الكرسي يكفينا
تـجـيـن ؟
يا بنت حسّت فيني الكراسي
وانتي ما تحسين
8
واطيِّح الجوال من يدّي
خايف وقتي يعدّي
وابتسمت , وكانت تبتسم
سألتها ايش الإسم ؟
قالت الإسم ما يعنيك
ومو كل ما تمنّى يجيك
9
رديت وانا كلّي حزين
ليه يا وجه الصّباح ؟
كان ودّي اقلك كلمتين وارتاح
تدرين
سنين وانا اجلس بنفس المكان
وكن الشمس تغرق بحزني
وكني انتظر انك تجين
10
أبسألك
ليه ما شدّني إلا وجودك
يا برودك !
شوفي معي كثر البنات
أكثر من الورد في صفحة خدودك
تعالي نلحق الليل
ونخلّي العالم لهم
ما أجمل الدنيا
لو ضمتني قيودك
11
وفجأه
تعدلت بجلستها
ومسكت الجوال
تبسمت وقالت كلمتين
( يمكن في عمر ثاني
يا حناني )
وناظرتني بحزن
يهد الجبال
ومر بقربها رجّال
اخذ ايديها
وقال :
تأخرت سامحيني
ومشت
ومعها ثلاث عيال