فرحتـي مش محتاجة سمَّـاعة بقلم:ميلاد ثابت إسكندر

اسـمـع بـقـي يا ابني أنت وهوَّ
طـرطـق ودنـك للــي هـقـوله
أيـوَّه هـتـسـمــع ، لـو بالـقـوَّة
ده كلام ليك بس علي أصولُه

المــوضوع وباخـتـصــار
علشان ما أطوَّلش عليك
أفراحنا بقت خزي وعار
وده واضح جـداً لـعـنيك

ده زمان قالوا فـي الأمثال
العــروســـــة للـعـــــريـس
لكن الحال بقي غير الحال
تقاليع بايخة وناس بتهيص

كـذا سـماعــة ترُج الشــارع
اسمها أيه لامؤاخـذة دي جي
والمـطــرب شــارب أو بالــع
مش مزيكة دي خناقة يا بيه

والكـارثـة إن الناس مُـنشَكحة
نازلين رقـص غـريب الشـكل
دي أغانـي من الأخـر وقـحـة
الـذوق مـات ،،، وإتاكل أكل

خبط ورزع ودَوشــة غريبـة
وشباب مَرسومة واستظراف
إللـي بيحصـل أكـبـر عـيـبَـة
أخلاقـنا بقـت خِـلـف خـلاف

والنـعـمـة وبـيـلـفـوا سجاير
محشـيـة حاجات مش ولابُد
ده غير البانجو سـارح داير
وحـاجـات بتـفـرقـع بتخض

وحبال من نور وصوانـي بتدور
مـولـد مـنـصوب تـحـت الـبـيـت
والشــــاي والســــاقـــع بالـدور
ومـهـازل يـامـا ،،، وحــواديـت

ومافـيـش تقـدير لظـروف الناس
لازم الحـنــة تـسّـمَّـع مـوســكـو
مـات جـوانا ،،، معني الاحساس
حـنـة أيـه !! يا اخـوانا إتـوكسـو

تقاليد وعادات ، أنا برصدها
فشخـرة ومـظـاهـر خـداعـة
وأنا أول واحـد برفـضهــــا
فرحتي مش محتاجة سمَّاعة
**************
ميلاد ثابت إسكندر
فنان تشكيلي
وأشكيلك
!!!