الأخبار
إعلام الاحتلال: خلافات حادة بين الجيش والموساد حول صفقة الأسرىالإمارات تواصل دعمها الإنساني للشعب الفلسطيني وتستقبل الدفعة الـ14 من الأطفال الجرحى ومرضى السرطانسرايا القدس تستهدف تجمعاً لجنود الاحتلال بمحيط مستشفى الشفاءقرار تجنيد يهود (الحريديم) يشعل أزمة بإسرائيلطالع التشكيل الوزاري الجديد لحكومة محمد مصطفىمحمد مصطفى يقدم برنامج عمل حكومته للرئيس عباسماذا قال نتنياهو عن مصير قيادة حماس بغزة؟"قطاع غزة على شفا مجاعة من صنع الإنسان" مؤسسة بريطانية تطالب بإنقاذ غزةأخر تطورات العملية العسكرية بمستشفى الشفاء .. الاحتلال ينفذ إعدامات ميدانية لـ 200 فلسطينيما هي الخطة التي تعمل عليها حكومة الاحتلال لاجتياح رفح؟علماء فلك يحددون موعد عيد الفطر لعام 2024برلمانيون بريطانيون يطالبون بوقف توريد الأسلحة إلى إسرائيلالصحة تناشد الفلسطينيين بعدم التواجد عند دوار الكويتي والنابلسيالمنسق الأممي للسلام في الشرق الأوسط: لا غنى عن (أونروا) للوصل للاستقرار الإقليميمقررة الأمم المتحدة تتعرضت للتهديد خلال إعدادها تقرير يثبت أن إسرائيل ترتكبت جرائم حرب
2024/3/29
جميع الأراء المنشورة تعبر عن رأي كتّابها ولا تعبر بالضرورة عن رأي دنيا الوطن

قصايد من ديوان (جلد الشوارع ) بقلم:اشرف عتريس

تاريخ النشر : 2019-05-21
(1) الكون خليه مليانه بالسر والبوح 

مخلوق صغير .. الوقت ..
بتهش الوقت بعيد ..
بتهش وترجع تتاوب ..
فيبان الصدا على سنانك .. 
والنمش يرسم فى وشك غصب عنك موت ..
ح تموت م النعس .. 
ح تموت بالقلق .. والكلام الخايب ..
مطرح ما انت واقف تلغى مكانك ..
تلبس جلد الليل فيسيح ..
والبرد يعرى الشجر النايم فى حضن رصيف .. 
يبتدى الشارع يصيد ... عيل فقير نعسان – عريان البدن والروح ..
شجر محروق وحاسس بالرطوبه ..
مكروبه – والنمل بيسند ضلك – فتافيت ..
لما الشمس بتدلق تقل عليك .. خلصان ..
مش قابل طعم الهوا ..
نفسك تقطع فيه بالحته 
والشتا يلحس فى عضمك ..
يلزق البرد فى هدومك ..
تتنفض م الهوس .
تهرب قد ما تهرب ..
فى اللون فى العتمه فى العرق الحى النافر جواك ..
فى الزحمه بعيد ..
بعيد عن كل الخلق وتركب موت ..
تعرف معنى الواجب ،
تلحق حزب ،
تخلع عين اللى يشوفك غاز بيسم 
تشرب من تلقيمة بن محمص من نارك ..
على روحك .. فتلقى البت شرقانه ..
البت تشوفك قبل النعس ..
تحط فى قلب السره / الكحل وعين الجمل – 
الله ...
وتلبس ملس ..
يا بووووووى..
تلبس م ل س 
**
(2) سر الولد ان 
دايره جوه دايره ..
فى انتظار كلمة ربنا العدل قبل ما يموت النهار ..
سر الولد ما يقلقشى ..
ولا يخفى عليكم سر .. يبان ..
للوجع عروق .. بتوسع وتضيق ..
حتى البحر بيشرب نار الشمس ويغلى زى الدم ..
فيحق لك تحزن .. يا طير بيموت فى جلده ويخاف الريح .
لو قل شويه الونس ..
تترجف ، يتخطف صوتك ، يتردلك تهتف : 
سر الولد كان ..
مدفون تحت ضل غيمة سحاب .. فى عز الشتا ..
قلبه كان مرهون على حد يشهد له فى لحظة حياد ..
قبل ما يروح النهار لآخر حددود الآرض ..
والدنيا تليل عليه غصب عنه ..
فما يلحقشى .. أخر فرد حمام راجع مفرهد – 
من لسعة شمس تخون الضل وتهرب مع حد تانى ..
يبتدى الوجع ( هديل وعويل ونواح ) ..
فى ليل مش عاوز يخلص ..
ولا حتى مبيّن نعس
الدنيا راحت والوجع بيعاودنى ..
جاى هياخذ منابة من خزين العياط 
اللى كان سايبه عندى فى منديل معقود ...
قلب الولد كان اطيب ما خلق ربنا وعمره ما اتغبن ..
جرحة مكنش اتلم ولا خف مطرح حزنة ..
لما استخار اااالله .. وهتف:
يالله..قبل ما يحين الموات حد يشهدلى ..
فيحق لك تعيط بصوت واطى ..
لما الغنا يما طل ويمر من خلفك ..
سر الولد كان .. خروشه قلق ونزيف من جسم هلكان ..
قلب الولد مااااات – لما غاب العشم ..
لما خان الوطن واتهجى حروف اسمه لوحده –
من غير ما يتشاهد على روحه " فى لحظة أسف ..
سر الولد ما يقلقشى ..
ولا يخفى عليكم سر بيسكن بدن ..

**
(3) بنات الحور .. 
بتحب الغنا ..والدق عا الصفايح مزاج الوطن .
يا بنات الحور ..
غنوا للقمر ..
ده القمر مخنوق ..
ويمكن ينتحر ..
شامم يا ضو ريحتك ..
وعينيك بتشاور على دنيا غير الدنيا اللى باعرفها ..
روح الوطن دخلانى نفس دخان ..
وغمزة عين فى عين الشمس اللى جيه من مشوار ..
هنتصاحب ..
ونمد الشراكه اللى بين عينى ومطرح غيابك ..
تقل المسافة .. وتختفى العدوده ..
( يا بنات الحور .. سيبو القمر .. ده القمر مسحور وناوى ع السفر ) 
ليلة ما باتت عينى مفروجه ع السما بتزيح النعس ..
وضيق الننى والدوخه طول النهار والوقفة على المحطة ..
والمشى تحت الكوبرى وريحة العرق والهوا الخلصان من بدرى .. ياااااه 
( يا بنات الحور مين عليه الدور ) 
تسلم عيونك يا وطن صحيح ..
تسلم عيونك بجد ..
تسلم بحق وحقيق تسلم وتتخبى قبل ما يشوفك شقايا القديم ..
قبل ما تشوف فوج البنات قاصد سوق المدينه 
والخجل والقهر فى العين الشمال
صدقنى ..
والله العظيم بجد وحياة المصحف الشريف 
وحياة العيش والقهر المتحاش بالغصب ..
البانجو .. ما بيسرقش الصوت زى ما انت فاهم ..
دا العتب بيشدنى لوشك المنسى فى الجورنان بالكدب ..
يا بنات الحور غنوا للوطن 
دا الوطن محروق والقلب مات قبل البدن ..
الدق ع الصفايح مزاج مغشوش ...
بس الزمن غير الزمن 

**

اشرف عتريس - مصر
 
لا يوجد تعليقات!
اضف تعليق

التعليق الذي يحتوي على تجريح أو تخوين أو إتهامات لأشخاص أو مؤسسات لا ينشر ونرجو من الأخوة القراء توخي الموضوعية والنقد البناء من أجل حوار هادف