عم عادل للشاعر سيد البالوي

عم عادل نفسه يسأل
والسؤال مش عيب (ياساده)
كلكم ناس فوق دماغنا
والسؤال بيجيب إفادة
يعنى مثلا
لما يسأل كل حاجه ليه (بتغلى)
يعنى مثلا لما يكتب
#مصري_لكن_نفسي_ابقى
مره فاهم ايه بيحصل
مين بيكذب ؟
مين بيسرق؟
مين بيكره إني مصري ؟
نفسى ابقى
مش بفكر ف الرغيف
مش بعظم للشويش
مش بضيع يوم بطوله
ف الإشارة وف الطابور
نفسى أكون إنسان فخور
أما أشوف إعلام بلادي
زى أب وابنه ناجح
زى فأس ف الخير تكافح
عم عادل قلب كادح
بس عمره ما كان جريح
نفسه يسأل
اللى غاضب ليه بيشتم؟
واللى فاهم ليه بيسكت؟
واللى نازل لجل بكرة
ليه يدوس على جندي أخضر ؟
امه قالت يا ابنى هفرح
قال لها بس أما أخلص
كلهم كام شهر يا أما
واجى اعافر ولا اسافر
ولا الاقى اى شغله
يبقى كافر انه صابر
ولا كافر انه مصري
عم عادل هز قلبي
زى مرزبة حديد
كان بيسأل كل مره
وكل مره اقول له (عيد)
والسؤال نفس السؤال
انت فاهم ليه دا حال ؟
الشباب عندينا اكتر
م الهموم جوة القلوب
والمعارف بينا تذكر
والعيوب هى العيوب
قلت يمكن .
قال لى (احلم)
بس عارف لو تقول
الكلام ممنوع ومؤذي
وانت شكلك واد مشاكس
قلبي مش مرتاح لمكرك
بس حاسس يوم ها تبقى
ويوم ما تبقى ابقى قول
#سيد_البالوي