وكمان سلام لمصر شعر: سعدو السبعاوي

وكمان سلام لمصر
شعر: سعدو السبعاوي


سلملي يابني على مصر

من تاني

وانا حيلتي ايه غير السلام ..

وكلام

انا اللي هواكِ يامصر

رماني ونساني

تشيلني ليالي البعد

وتحطني الايام

مجذوب وسحرك سباني ..

جابني ووداني

لاطلت شطك ولا في نيلك

بقيت عوام

سواح مهاجر ، وهاجر

زماني ومكاني

فيكي بدور عليكي

صاحي وفي الاحلام

درويش وحالف ..

ايه جاني من حلفاني !

وطالون مالوش مرسى

والقبه من غير مقام

وطولون دا بدا سلسال احتلال

منه بتاعني

من يوم يومك يا مصر ..

بجد الجد ..

مش فرقعة اعلام



سلملي يا ابني على مصر ..

من تاني

سيب الكلام ..

وعيش في احلى سلام

فاكر سلامها وهي عنوانك

وعنواني ؟!

وللا نسيت ..

يوم ما تاويت اليقين

في تربة الاوهام ؟!

فاكر لغاها ساعة صفاها ..

انغام واغاني

والضحكه ترسم وشّها بدر التمام

والكل يصحى يصبّح ..

ويسرح ..

يزرع ويصنع ..

ويعلّي في مباني

يكتب ويقرا ..

يحالف ، يخالف

بكل الاخوّه وكل احترام

عمره ما كان مرتاح

في جنه رضواني

لكنه مش خايف

مطرح ما ترسي ينام

يلعن ابو الدنيا في ساعه شيطان

ويبوس راسها في ساعه رحماني

ويبقى نهارنا فل ..

هادي ونادي ..

وكله اخر انسجام



سلملي يا بني على مصر من تاني

وقل لها فينك ..

مناي اصحى على ابتسامتك

وفي حضن قلبك انام

لملم صحابك ..

ماتقلش ده حكومه

والتاني اخواني

من غير عيونك يا مصر

كلنا ايتام

ومن غير عزك يا مصر

المجني عليه جاني

عشقك انتي بس

هو حلال الحلال ..

وعلى غير هواكِ يا مصر

غدر وخيانه وحرام ..

عين الحرام

سعدو السبعاوي