ازجال بقلم:ياسر شرف

قصيدة ازجال
========
عالم زجل وده فيه ازجال
وكلام كتير وبدون أفعال
واحد يقول اه يا ليلى طويل
ويبات وينشد فى المواويل
ويمدح فى أهله بكل الخير
واخرتها برضه يا ليلى يا عين
وواحد يقول الآه ويميل
واهاته تسرى فى وادى النيل
يمكن يكون تعبان ومريض
وفى كل أهه يزيد ويعيد
ويمكن يكون مبسوط واكيد
بفرحه يعنى فى ليلة عيد
واللى بيسعى لرزقه كمان
يدعى بشدة للرحمن
ودعاؤه ممزوج بالالحان
فيه الرضا وبكل إيمان
وفيه ده مسطول فى التوهان
وخياله خصب وعال العال
قاعد يقسم أشكال والوان
مبسوط بشدة من الروقان
واستاذ بيدى كده فى دروس
وياخد فلوسه ويضرب بوز
وعمال أملها يعنى تعيش
وترزق بفرخة ولقمة عيش
وحميدة بتخانق حمدان
عايزة فى جاموسة وكم فدان
والعمدة دايما كده بينام
ويقول بسرعة كله تمام
ودكتور يعالج كده مرضاه
ويقول ده كله بأمر آلله
وبنات بتحلم كده وتنام
بعريسها يجى باى حصان
والزفة برضه مع فستان
وزغاريد تلعلع فى كل مكان
وحياة جديدة مع الأيام
ورسالة يكتبها الانسان
ومولود يعلى الصوت على طول
والفرحة تكبر كده بجنون
والشيخ يودع كده ويفوت
ويسيب لغيره كده ويموت
نهار وليل وغروب وشروق
وبداية ونهاية للمخلوق
والحمد موصول ب العرفان
لخالقنا وحبيبنا الرحمن
مع تحيات الفقير الى الله
ياسر شرف- كبير محررين مترجمين
بقطاع الاخبار- الاذاعة والتلفزيون