أنا اللى شايل فى القلم سيفى ... شعر: رفعت المرصفى

أنا اللى شايل فى القلم سيفى ... قصيدة لـ رفعت عبدالوهاب المرصفى
---------------------------------
{1}
ولأنى ... مش شاعر وبسْ
ولأنى مش عاشق وبسْ
ولأنى معجون ... بميّة الكتاتيبْ
ولأنى ... شاطر حسن ....
ساكن دفا الحواديت
فـ انا الفارس ... وانا الحارس
وانا اللى شايل فى القلم .. سيفى

(2)
ولأنى مش شاعر ... وبس
ولأنى مش عاشق .... وبس
ولأنى إبن الشهيد .... اللىّ عبر بينا
ودمه ... كان الوسام اللىّ حضن سينا
ولأنى ابنك ... وراجلك
وحبك فى الوريد جامح
فـ انا الفارس ... وانا الحارس
وانا اللى شايل .. فى القلم .. سيفى
 
{ 3}
ولأنى ... مش شاعر وبس / ولاعاشق وبس
ولأنى معجون ... بمية الكتاتيب
ولأنى من يومى ...
وانا فارد قصايدى .. فوق شواشى الغيط
ولأنى من يومى ... وانا بـ اعبر
حدود الحلم والمعنى
ولأنى من يومى ...
وانا شايف للعبووووور ... معنى
ولأنى ابنك .... وراجلك ْوالرجال معنى
فـ انا الفارس ... وانا الحارس
وانا اللى شايل ... فى القلم سيفى

{4}
ولأنى مش شاعر وبس
ولأنى مش عاشق وبس
ولأنى مولود .. على الفُرن
اللىّ فى القاعة اللى جنب الباب
ولأنى من يومى وشِعرى عـ المدى لبلاب
ولأنى مفطوم .. عـ التوتة والجميز
والساقية دواّره ...
بتروى بالحليب روحى
فـ انا الفارسْ ... وانا الحارس ْ
وانا اللى شايل فى القلم ... ســيفى