البداية .. شعر د. ميرفت سعد

( البداية )
رايحة فين ...؟!!!
كنت فاكرة ....
إنك بدأتي تلاقي َنْفسك
وإنك بداتي تشمي نَفَسك
رايحة فين ؟!!!!

السنين عدّت علينا
والزمن ... ابتدا يحفر في وشّي
كنت فاكرة إنه ناسينا
كان بيتفنّن في غشّي
رايحة فين ؟!!!
لسّاكِ شاربة كاس مرار
لسّاكِ عاشقة الانتظار
وأبدأ كلامي وأنتهي
وإنتي ليل بدون نهار
رايحة فين ؟!!!
عمّالين نشد فيكي
مربوطين بحبال إيديكي
ونضيع سوا
إنتي وأنا ....
من غير ما نعرف .....
رايحة فين ؟!!!
الأمان كان جوّا حضنك
بس دلوقتي الأمان
كان وانتهى
عايزين نرجّع
تاني فيكي ذكرياتنا
عايزين نقوّي الحبل
اللي كان رابطنا ....
نخرج ونرسم ف الشوارع
نحلم نرجّع عمر ضايع
فكّريني .....
فكّريني لمّا أجيلك
أستحمّى ... وأقلع همومي
وأفرك عيوني
وأشم فيكي ذكرياتي
وأبدأ أكحّل
كل اللي جاي من حياتي
بالله عليكِ فكّريني
أزور قبور كل اللي
نفّض عن عيونك التراب
كل اللي حُبّك داب ف قلبه
وهوّ .. غاب
كل اللي ندّد ....
كل اللي هدّد ....
كل اللي ردّد....
كل اللي قال ....
كلمة بحبّك ....
فكّريـــــــــني
أجمع ورودي ....
واجتاز حدودي
وأرمي أوراقي اللي فاتت كلّها
وأكتب شهادة ميلادي من جديد
رايحة فين ؟!!!!!
ما إنتي قاعدة ... وساكنة فيّ
عايشة بيكي ... وعايشة بيّ
عمري كلّه هدية ليكي
دايماً كده حرّة وأبيّة
رايحة فين ؟!!!
كل السنين متفرّقة
كل الجسور متشقّقة
كل الأماني معلّقة
رغم الحدود ... والوعود
اللي مِش متصدّقة
لسّه دايبة ف كاس غرامك
لسّة بحلم بابتسامك
فجر فجأة بيتولـــد
والملامح تتوجــــد
نبدأ نعيد ترتيب حياتنا
نمحي قساوة ذكرياتنا
ببدأ معاكي من جديد
وأسمع ف صوتك
من بعيد ....
بيغنّي .... بكـــــــــــرة
بكرة أحلى م انهرضـة
نبدأ نردّد ....
بكرة أحلى م انهرضة
سِكة هوانا ابتدت
ننسى الهوان ... ونقول
(هوى )!
واللي باقي من حياتي
عيد أكيد.....
طول ما أنا وإنتي سوا

(تمت )
شعر / د. ميرفت سعد