كات حارتنا فيها نلعب كل حاجة .. شعر: رفعت المرصفى

10- كات حارتنا فيها نلعب كل حاجة ... صورة شعرية لـ رفعت المرصفى
شخصيات خالدة من ديوان " زمان الطيبيين"
-----------------------
أحكى إيه واللاّ إيهْ
والحكاوى ..
زىّ تكعيبةْ عنبْ
لو هنِمسِكْ طرْف منها
ممكن تعدّى ألف حارة
وألف زُقة فى البلدْ
المُهم ... كان هناك
" درب غايش " ( )
لو تحبوا تسألوه .. هوَّه هوَّه
زى ما هُو لسه عايش
يااما ... عِشنا فيهْ
ولعبنا فيه
واحنا لســه صغيّرين ْ
ومعايا كان "الحاج عادلْ
ومحمد الباشا
ورضا النادى ..
ومحمد عبدالعزيز...
والأخير .... كان عزيز
مبروك مصلحى .. ألف رحمة ونور عليه ( )
كاتْ حارتنا
هىّ دارنا / كات قدرنا
فيها نلعبْ كل حاجةْ
حتى برضوا لو سِهرنا
فيها نلعب كورة ... جايزْ
فيها نلعب بِلْى .. جايز
فيها نلعب بالظَّلط أو بالورق أو بالأزايــزْ
واليوم طويلْ زى عمك " بربرى " ( )
واليوم طويلْ زى السنة لو كنت عايز
" لا راديو فيه
ولا سيما فيه
ولا فيديو فيه
ولا دِش فيه
ولا نِت فيه
ولا حاجة خالص ( )
واللهْ عليك يا زمان الطيّبين يا للّى انتهيتْ
وما عادشى منّك إلا ريحة الذكرياتْ
وما عادشى منّك إلا حرف بنرسمُه زى السُّكاتْ
يمكن يعيشْ / يمكن يموتْ
يمكنْ فـ يوم ينطلقْ بــرّا التابوتْ
ويقول ......حاجات