7- سِتى " السيدة " .... صورة شعرية لـ رفعت المرصفى
شخصيات خالدة من ديوان " زمان الطيبيين"
------------------------------------
هـ ارجعْ معاكمْ مرة تانية "للكانون"(1)
اللّى كان له عِينين
عين كبيرة للطبيخْ
بس نارها كات قويةْ
والصَّغيرةْ .... للسَّليق أو للقَليّةْ
والوقيد فوق السطوحْ كان الحطب ْ
والقطن كان له عيدان زى الخشبْ
"والجِلة" كانت عـ السطوح مترصصّةْ(2)
زى رص البنّايين ساعة البُنا
والجِلة كانت للخبيز أو للطّبيخ
والطّبيخ فـ الوقت ده كان صَنفه إيه ؟
"خُبيزة " ( 3) كانت بالفِريكْ
أو رِجلة طازة بتناديك (4 )
أو "كِشك" معمول مـ الدقيق
واللَّحمة كانت مرة واحدة مـ السِّويقةْ
والسِّويقة عندنا يوم التَّلاتْ
كان سِيدى ديما يشتريها
ويسرّها جوا منديله القماشْ
ويحطها فى حِجر سِتى " السَّيدةْ "
لاجل ما تطبُخها بإيدها الطيبةْ
وأنجر ( 5) الفتّة ضرورى عـ العَشا
والأكل ديما باليمين
وما كانشى فيه فـ الدار معالقْ
والأكل كان بالصوابع والإيدين
والحِلو كان "مفروكة" شاربة مـ اللبنْ
ومرة كان "شِعرية" يحضُنها العسل ْ
"شِعرية" .... لَكن منزلية ْ
يعنى مصنوعة عـ " القادوسْ" ( 6) جُوّه الوسِيّة ْ
ومنشِّفِنْها عـ الطَّبالى فـ السطوحْ
والحلو كان " قرْع العسل"
كان سيدى ديما يشتريهْ لاجل الضيوفْ
هو ده كان الطبيخ ...
من غير مبالغَةْ أوْ كُسوف
والطّبيخ كان لهْ لوازمْ
واللوازم عند سِتى
وسِتى كانت ليها "صُفّة" ( 7 ) للخَزين
والصُّفة كانت فيها إيه ؟
فيها زِبده – فيها قِشطة - فيها جِبنهْ
فيها دِهن مِسيَّحاهْ
ومنشّفاه جُوه "البِرام" (8 )
و" المَحْلبة" ( 8) مَليانة بيض ْ
والقَعبة ( 8) كان فيها الجَميدْ ( 9)
والشَّنايشْ (10 ) والصَّفايح والطاقات ْ (11 )
كانت عِشش لاجل الحَمامْ
والصُّفة ممنوع فتحَها
إلا اما ستى تيجى هيّ بنفسها
إشْمِعنى يعنى تيجى هىّ بنفسها ؟
والجواب .... الصفة كان مفتاحها واحد ْ
لُهْ رُباط ... موجود معاها .....
وِمضَفّراه ويّا خِصلةْ شعرها
ماهى واحدة من زمان الطيبيين اللى انتهى
ومعادشى منّهْ إلاّ كنز الذكرياتْ
يمكنْ يعيش ْ .... يمكنْ يموت ْ
يمكِن فـ يوم ينطلقْ برّا التابوتْ
ويقووووول .... حاجاتْ
------------------------------------------------
(1) الكانون : موقد ريفى بدائى للطهو وقوده من الحطب والجلة
(2) الجلة : نوع من الوقود الريفى البدائى " يصنع من روث البهائم "
(3) الخبيزة : نوع من الخضروات الريفية التى تطهى .
(4) الرجلة : نوع من الخضروات الريفية التى كانت تطهى فى الماضى
(5) الأنجر : وعاء معدنى ريفى قديم
(6) القادوس : هى آلة بدائية ريفية لصناعة الشِّعرية .
(7) الصُفة : المكان المخصص للخزين فى بيت الشاعر القديم
(8) البرام والمحلبة والقعبة : أوانى فخارية فى الريف فى ذلك الوقت
(9) الجميد : يصنع من اللبن الرايب بعد إضافة الملح إليه
(10) الشنايش : جمع شنيشة وهى تجويف طويل يُصنع فى جدار المنزل الريفى القديم توضع فيه الأشياء الصغيرة
(11) الطاقات : جمع طاقة وهى تجويف أكبر من الشنيشة يصنع فى جدار المنزل على شكل شباك وتوضع فيه الأشياء الكبيرة نسبيا
شخصيات خالدة من ديوان " زمان الطيبيين"
------------------------------------
هـ ارجعْ معاكمْ مرة تانية "للكانون"(1)
اللّى كان له عِينين
عين كبيرة للطبيخْ
بس نارها كات قويةْ
والصَّغيرةْ .... للسَّليق أو للقَليّةْ
والوقيد فوق السطوحْ كان الحطب ْ
والقطن كان له عيدان زى الخشبْ
"والجِلة" كانت عـ السطوح مترصصّةْ(2)
زى رص البنّايين ساعة البُنا
والجِلة كانت للخبيز أو للطّبيخ
والطّبيخ فـ الوقت ده كان صَنفه إيه ؟
"خُبيزة " ( 3) كانت بالفِريكْ
أو رِجلة طازة بتناديك (4 )
أو "كِشك" معمول مـ الدقيق
واللَّحمة كانت مرة واحدة مـ السِّويقةْ
والسِّويقة عندنا يوم التَّلاتْ
كان سِيدى ديما يشتريها
ويسرّها جوا منديله القماشْ
ويحطها فى حِجر سِتى " السَّيدةْ "
لاجل ما تطبُخها بإيدها الطيبةْ
وأنجر ( 5) الفتّة ضرورى عـ العَشا
والأكل ديما باليمين
وما كانشى فيه فـ الدار معالقْ
والأكل كان بالصوابع والإيدين
والحِلو كان "مفروكة" شاربة مـ اللبنْ
ومرة كان "شِعرية" يحضُنها العسل ْ
"شِعرية" .... لَكن منزلية ْ
يعنى مصنوعة عـ " القادوسْ" ( 6) جُوّه الوسِيّة ْ
ومنشِّفِنْها عـ الطَّبالى فـ السطوحْ
والحلو كان " قرْع العسل"
كان سيدى ديما يشتريهْ لاجل الضيوفْ
هو ده كان الطبيخ ...
من غير مبالغَةْ أوْ كُسوف
والطّبيخ كان لهْ لوازمْ
واللوازم عند سِتى
وسِتى كانت ليها "صُفّة" ( 7 ) للخَزين
والصُّفة كانت فيها إيه ؟
فيها زِبده – فيها قِشطة - فيها جِبنهْ
فيها دِهن مِسيَّحاهْ
ومنشّفاه جُوه "البِرام" (8 )
و" المَحْلبة" ( 8) مَليانة بيض ْ
والقَعبة ( 8) كان فيها الجَميدْ ( 9)
والشَّنايشْ (10 ) والصَّفايح والطاقات ْ (11 )
كانت عِشش لاجل الحَمامْ
والصُّفة ممنوع فتحَها
إلا اما ستى تيجى هيّ بنفسها
إشْمِعنى يعنى تيجى هىّ بنفسها ؟
والجواب .... الصفة كان مفتاحها واحد ْ
لُهْ رُباط ... موجود معاها .....
وِمضَفّراه ويّا خِصلةْ شعرها
ماهى واحدة من زمان الطيبيين اللى انتهى
ومعادشى منّهْ إلاّ كنز الذكرياتْ
يمكنْ يعيش ْ .... يمكنْ يموت ْ
يمكِن فـ يوم ينطلقْ برّا التابوتْ
ويقووووول .... حاجاتْ
------------------------------------------------
(1) الكانون : موقد ريفى بدائى للطهو وقوده من الحطب والجلة
(2) الجلة : نوع من الوقود الريفى البدائى " يصنع من روث البهائم "
(3) الخبيزة : نوع من الخضروات الريفية التى تطهى .
(4) الرجلة : نوع من الخضروات الريفية التى كانت تطهى فى الماضى
(5) الأنجر : وعاء معدنى ريفى قديم
(6) القادوس : هى آلة بدائية ريفية لصناعة الشِّعرية .
(7) الصُفة : المكان المخصص للخزين فى بيت الشاعر القديم
(8) البرام والمحلبة والقعبة : أوانى فخارية فى الريف فى ذلك الوقت
(9) الجميد : يصنع من اللبن الرايب بعد إضافة الملح إليه
(10) الشنايش : جمع شنيشة وهى تجويف طويل يُصنع فى جدار المنزل الريفى القديم توضع فيه الأشياء الصغيرة
(11) الطاقات : جمع طاقة وهى تجويف أكبر من الشنيشة يصنع فى جدار المنزل على شكل شباك وتوضع فيه الأشياء الكبيرة نسبيا
