سيدى محمد ودرب الوسية .. شعر: رفعت المرصفى

6- سِيدِى محمد ودربْ الوسيّة ومسجد سيدى عبد العزيز.... صورة شعرية لـ رفعت المرصفى
شخصيات خالدة من ديوان " زمان الطيبيين"
----------------------------------------------------
أحلفْ بإيه واللّا إيهْ ...

والطّيبين فوق فى السّما زىّ النجوم ْ

لانجم ْيوم راح ينطفى

ولا نجم تخفيه الغيوم

أحلفْ بساقية لسّه باقيهْ

عُمرها من عمر ابُويا

لوْ تدورْ ... تحكى التاريخ من أولّهْ

وتسنْبِلُهْ

بين المَراوى والغيطان

أحلف " بنُورج " ( 1)

موجود حِدانا للنهارده ْ

شاهد على عطر الزمان ْ

ياما كُنا بنركبُهْ

ويلف بينا عـ السنابل والعيدانْ

أحلف بأحرفْ

مـ " القيامة والبلدْ " ( 2)

أحلف بجمّيزة ْ وصُفصَافهْ ووَتَدْ

أحلف بباب "المندرةْ "

وخيوط عباية معطّرة ( )

متعلّقة فوق الحيطانْ

أحلفْ بحبّات الثرى ؟(3 )

أحلف " بسِيدى " واللاّ " سِتّى "

والحاج أنور ْ اللىّ كانْ ( 4)

أطيبْ مـ فى كل الجيرانْ

أحلف بأنغام الآدانْ

اللّى ساكن من يوميها جُوا دارنا فـ " الوِسِيّة " (5 )

أصْل دارنا ..

كان فاصلها عن جامعنا خطوتينْ

قُول دارين أو تلاته بالتّمام

وُهّو جامع سّيدى عبد العزيز ( 6)

لسّاه عزيز ْ

لسّاه قُريّبْ من قلوب الموجودينْ

لسّانى شايفْ صورة ابُويا ويّا سِيدى

بين جُموع الساجدينْ

لسّانى باحرصْ عـ الصّلا فـِ نفس المكانْ

لمّا بتُحضُنّى البلدْ من حينْ ....... لحينْ

لسانى بادعى ... لاجل ابنى ....

ِيْورثْ مكانّا فى صفوف الراكعينْ

أحلف بإيه واللاّ إيه ْ

أحلفْ بطبليةْ عفّية ْ

بتلمّنا ساعة العَشا

ولاحَد يقدَرْ يبتِدى ويمد إيدُهْ

ويلمسْ رغيف ْ

لوْ حتى ضيفْ

إلإ امّا سيدى يبتِدى بالبسْمَلةْ

ونقول وراه ْ...

ونقوم معاهْ

ونصُب له يغسل إيديهْ

الله عليه ْ ...

والله عليك يا زمان الطيّبين

يا اللّى انتهيتْ

وما عادشى منك ْ

إلا ريحة الذكرياتْ

وما عادشى منك ْ

إلا حرف بنرسمُه ْ

زىّ السُّكاتْ

يمكنْ يعيشْ / يمكن يموتْ

يمكنْ فـ يوم ينطلقْ بَرّا التابوت

ويقوووولْ .. حاجاتْ