حبيبى مدرس بقلم:ياسر شرف

حبيبى مدرس
========
حبيبى سكر سنترفبيش شغال ده خوجة وبالتدريس
لما يقابلنى فى حصة ساعات بيكون فى راحة من الاولاد
والوقت عنده ثمين وعزيز بالثانية يعنى بشكل يغيظ
يدينى حصة حنية ويجرى يلم النقدية
لو جدوله فيه وقت قليل يسيبنى فى ميدان التحرير
فى المدرسة معروف وشهير وعلمه يكفى وادى النيل
محجوز تمالى وفى الاجازات يدى لطلبة وللطالبات
ينام وياخد تعسيلة ويقول بأحب الطباشيرة
يحبها وتاكلنى الغيرة ماانا حلوة برضه وشهيرة
انا حصتى هى حياتى واخدها فورى ويوماتى
يا ابو الدراسة يامدرس خليتنى باسرح وباهيس
ناظر فى قلبى ليل ونهار وجرسه دقه باستمرار
يكتب فى صفحة لحياتى بالحب والود يوماتى
كاتب مشاكل عاطفية وكتابه مفروش حنية
وبترجمة ده لكل لغات يزيد ويبعت فى ماسيجات
وكلامه فصحى وعامية مجرور بأشياء عاطفية
مرفوع ساعات وكمان منصوب يزيد عزوبة يهز قلوب
يشرح يوصل للمطلوب فى مفاعلة سهلة ويملا الكوب
فى تاريخ وحتى الجغرافيا يحفظ عهوده بالعافية
وضحكته صافية لذيذة خليتني فى هواه تلميذة
بحر الثقافة العربية وكأنه جامعة وكلية
يشحن بكارت او حتى بغاز ولقبه دايما الاستاذ
فى المدرسة او فى سناتر حسابه دايما فى دفاتر
امتى نحقق فى الاحلام وتجمعنا عشة طير وحمام
وتبقى دروسى خصوصية مليانة حب وحنية.
مع تحيات الفقير الى الله
ياسر شرف- كبير محررين مترجمين
بقطاع الاخبار- الاذاعة والتلفزيون