عزمت الشمس بقلم:محمد أبوالفضل

عزمت الشمس عشان
تشربني في كاسة شاي
والحلم طريق لف وغربني
في حضنه ازاي........
والسكه لعندك عمري الجاي
بين ظهر الطاوله الخلق كتيره و المشاريب
شيش بيش يا معلم......
يلا اقلبها وهاتلي حبيب
مين تاني بيفهم يلاعبني
يمكن ميمتش.....
وفي اخر صف لقيت
الشايب ده بيقش
ولقيت البنت بريئة
وطاهره ولابسه حجاب
والواد بقي كومي خنقلي
هدومي عملي حجاب
والتسعه اللسعه دي خانت
البصره وقفلت باب
وتراب الارض بينفض نفسه
اكمنه امير
جمبيهم لسا الضمنه بتعشق
فن الطير
بتلون ارقامها البامبي
فوق راسي بتنزل وتغني
واكمن مرارها في قلبي نشاذ
كسرت الحلم في صوتي بفاس
وحلمت العبها وتلعبني
والواد فلافيلو بينده نزل للطلبات
بيلف زبالين القهوة بكلمة....مين كسبان
والست نفيسه بتنده جوزها يا سي رمضان
الاد محمود ابنك عيان
كان باين ان جيوبه معانده للأيام
كشر ضحكتنا وقال يا سلام
اهو لسا فاضلك عشرة كمان
والحجر السارق للأفكار مبقيش بيسر
اتغم كمان بالحسره وسابني في ذنبي افضل اجر
وصويت النيل على ست جارتنا من الارياف
دا ولاد الشوم سووها في وسط ترابنا الحاف
ولا حسبوا عليها ولا غطوها يدوب هبدوها بوش انصاف
والست تفيده بوش القهوة بتقرى الغيب
اقلب فنجانك......يمكن تعترني وتبقى حبيب
والواد مسعود بياع البانجو .....عملنا شيخ
بيرش السم في وسط الحله وبيقول حي
السكه بعيده وحزنك زي العمر الجاي
شباكي استنكر لكلامه ...قام رد الشيش
وعملي حكايه وقلي تعيش
واتنطط قلمي وهاتيك فيا قلام تلطيش
وانا بنزف المي.....مسحلي دموعي بخط الريش
وعملني كتاب سماني في حقه
الحزن البايت في النخاشيش
......................
.....................

عبد الرحمن مدين