لـــســه فـــاكــــر بقلم:تامر السعدني

امام احدى القنوات الفضائية وهي تعرض حلقة من حلقات فوازير الفنانة القديرة نيللي كُنت جالس بجوار والدتي ذات السبع والستون عاماً اطال الله في عمرها وأعطاها الصحة والعافية ، نتابع هذه الحلقة بأهتمام بالغ وكأننا نشاهدها لأول مرة وبعد انتهاء الحلقة انطلقنا في نفساً واحد " والله كانت احلى ايام " فأذا بوالدتي تبدأ في فتح خزائن الذكريات الجميلة وقالت " فاكر ايام زمان وبركتها كانت كل حاجه جميلة ولها طعم حلو عن دلوقتى فاكر برنامج العلم والأيمان بتاع الدكتور مصطفى محمود وازاى كنا بنتلم علشان نتفرج عليه ، فاكر برنامج عالم الحيوان والموسيقى بتاعته ، فاكر يوم الجمعة زمان كان ازاى وكان يوم جميل اد ايه كنا نصحى كلنا قبل الصلاة بدرى ونفطر واحنا بنتفرج على برنامج سينما الاطفال علشانكم وتنزلوا انت ووالدك الله يرحمه تصلوا وترجعوا يكون الغدا بيتعمل وبعد غداكم كنا نخرج واحنا فى منتهى الفرح ونتفسح وكنا بنمشي في الشوارع بمنتهى الآمان وكانت الشوارع ليها شكل تانى عن دلوقتى وحتى الناس كنت تبص في وشوشها تلاقيها كلها سعادة ورضا مش النهاردة بتروح تصلي الجمعه وافضل ادعى انك ترجع بالسلامه وانا خايفه من المظاهرات ، طب فاكرفي رمضان لما كنا بنفطر كلنا في بيت جدك وبعد صلاة المغرب نقعد نسمع المسلسل العربي بتاع إذاعة الشرق الأوسط واحنا بنفطر وبعدها كنا كلنا نقعد نتفرج على فوازير نيلي أوسميرغانم ، وفاكر بعدها لما كنا نستنى برنامج يا تلفزيون يا ولا لما كنا نروح الحسين او السيدة قبل الفجر نتسحر هناك ونصلي الفجر ونرجع البيت ، طب فاكر برنامج الشيخ الشعراوى الله يرحمة اللى كان بيجي قبل المغرب بساعه وازاى كنتوا بتفرحوا وتقولوا ان خلاص كده قربنا نفطر، كان ساعتها الخير كتير وكان حتى الموظف بيقدر ياكل اللحمه والفراخ كذا مره في الشهر وكان ربنا مبارك في كل حاجه وكانت كل حاجه جميلة ليها طعم غير ايامكم دى مفيش حاجه حلوة ولا حاجه ليها اى طعم ولا بركه ، انت فاكر الايام دى ؟؟
فقولت لها وانا كلي حسرة وحزن بعد ان مرت أجمل ايام حياتى امام عيني كأنها شريط سينما اثناء تذكرها لأيام زمان " ايوة يا أمى للأسف " لـــســـه فــاكـــــر"
فتسألت بعدها مع نفسي ماذا حدث وماذا يحدث ولماذا لا نستطيع أن نشعر بأى شيئ جميل في تلك السنوات ولا يوجد اى طعم لاى شيئ كما قالت امى حتى في أجمل لحظاتنا مع زوجاتنا وأزواجنا أو اطفالنا أو أصدقائنا كله كله ليس له طعم زمان كله مجرد لحظات عابرة ليس لها اى تأثيريُحفر بالذاكره وأغلبنا دائماً ما يقول لا شيئ مثل الماضي أصبحنا نعيش في مجتمع كل ما فيه مجرد صناعي لا يوجد به اي شيئ طبيعي على الأطلاق لا مشاعر ولا عمل ولا حياة فكله أصبح صناعي
لا أعلم ماذا حل بنا أو بمجتمعنا ولكنني على يقين ان الكل يقولها معي أنه ما أجمل الماضي و " لــسـه فــاكــر " .
بقلم / تامر السعدني