جميع الأراء المنشورة تعبر عن رأي كتّابها ولا تعبر بالضرورة عن رأي دنيا الوطن

شعر /

ثورة الشعب المصرى 25 يناير شعر : حسام العقدة

تاريخ النشر : 2011-02-12

خ- خ+

بيان رقم 1
الشعب المصرى اتكلم
خلّى العالم يتعلم
ورؤوس الظلم تسلم
كان حلم حقيقى بعيد
هنقول إيه والا نعيد
إحساس أحلى من العيد
بيعيشه الشعب المصرى

بيان رقم 2
الشعب طلع مش همه
جاب الحريه بدمه
وشهيد شايله أبوه وامه
راجل سبعه وستين
وبطل تلاته وسبعين
فى الواحد والعشرين
راجع م الشعب المصرى

بيان رقم 3
الشعب المصرى ده احنا
محمود مع مرسى وحنا
عدينه مع بعض المحنه
مش أحزاب ولا تيار
مش حركات لأ .. أفكار
محتاجه الاستقرار
فى حياة الشعب المصرى

بيان رقم 4
الشعب المصرى يثور
وبعدل ف الدستور
ويبدل ضلمه بنور
الفاسد هربان خاف
لكن حق وإنصاف
عارفين مين م الأشراف
لسه مع الشعب المصرى

بيان رقم 5
الشعب المصرى اختار
وأخد مع بعضه قرار
ثوار ثوار ثوار
هتافات بحروف عربيه
عايزين عدل وحريه
وحكومه صريحه قويه
توقيع الشعب المصرى

بيان رقم 6
الشعب شبابه بهرهم
كانت السلطات فاكرينهم
فاضيين وما فيش خوف منهم
كام واد ومعاه كام بت
قاعدين يلعبوا ع النت
كان هوه دا أول خط
بيخطه الشعب المصرى

بيان رقم 7
الشعب المصرى اتجمع
وحلف ما لبيته ها يرجع
غير لما العالم يسمع
خطوات مع بعض تسير
تعمل أضخم تغيير
وما فيش أبداً تفسير
غير إنه الشعب المصرى

بيان رقم 8
الشعب المصرى أصر
وما تسألنيش ع السر
الحر ها يفضل حر
شعارات بدأت تتطبق
وحاجات لسه ها تتحقق
دلوقتى الناس بتصدق
قيادات الشعب المصرى

بيان رقم 9
الشعب المصرى اتحدى
فوق احتمالاتهم عدى
ثورات سلميه وجاده
مش وقت كلام سيبنى
وانده إبنك وابنى
عايزين نرجع نبنى
بإيدين الشعب المصرى