مين يشتري إعفائي الجمركي !! بقلم: محمود عمور

لا تقولوا محمود غاب ورجع بعد فترة يحكي بالعامية ونسي انه لسانه فصيح وكلامه بديع وترى شكله انجن وعقله طار!!! وأنا بقلكم والله لا انجنيت ولا عقلي طار بس من الي بالدنيا محتار!!!
و اسمعوا هالقرار يا إخوان رئاسة الوزراء أقرت اشي اسمه اللائحة التنفيذية لقانون الإعفاءات الجمركية لاقتناء سيارات خاصة بالمعاقين اووووووو الي بسمع بقول والله في تطور وبطبقوا ببنود ضمن قانون حقوق المعاقين الفلسطينيين رقم 4 لسنة 1999م والله يا عم ريتني معاق وأوخذ إعفاء جمركي وأجيب سيارة!!! هيك الغشيم بقول بس تعالوا معي نشوف شو الفهيم بقول:
ما بدي أدخل بتفاصيل اللائحة التنفيذية لأنه أصلا مش موضوعي اعوجاجها لأنها غير سليمة وكيف مفصلة على قد إلي بقدر يلبسها بالضبط!!!
بدي أحكي عن أولوية هالقرار:
وانه يا ترى رئاسة الوزراء العظيمة ما لقيت من بين بنود قانون حقوق المعاقين غير هالبند تقر بتنفيذه!!! يعني وصلوا المعاقين الفلسطينيين إلى قمة الرفاهية وما ضل عندهم مشاكل غير إنهم يركبوا سيارات موديل 2006 وطالع قال هيك القانون!!
المهم بجوز تقولوا أنا غلطان وكويس هيك قرار لكن رح أثبت بالنماذج التالية الأولوية :

نموذج 1 معاق بقول: حلوووو ببيع الإعفاء وبكمل علاجي!!!
نموذج 2 بقول: ببيع الإعفاء وبشتري طرف صناعي لأنه الطرف إلي معي خرب والصحة ما بتامن النا أدواتنا المساعدة والأجهزة الطبية!!!
نموذج 3بقول: ببيع الإعفاء وبعمل إلي دكانة بالحارة اترزق من ورآها !!!
نموذج 4بقول: ذهب ذهب هالقرار ببيع الإعفاء وبتجوز صار عمري 37 سنة وبعدني أعزب!!!
نموذج 5 بقول: هو أنا معي مصاري أعمل رخصة سواقة أصلا!!!
نموذج 6 بقول: معي رخصة سواقة بس ما معي حق عجال سيارة مش نص حقها!!!
وأنا بقول كل إلي قالوه فوق !!!!!
وبالفعل هيك صار ينباع الإعفاء باتفاقات جانبية و بأسعار !!!!
وهون بقول: يعني يا حكومتنا تركتي العلاج والتأهيل و العمل وقفزتي هالقفزة النوعية يا ترى شو السر!!!
ااااااااااااااه هسا فهمت بالفعل أنا إلي باقي غشيم !!!!!
الحكومة بجلساتها قالت يا جماعة إحنا بنطبق هالقرار وبشوف الشعب كيف انه عنا نوايا حسنة ومهتمين بالمعاقين وقضاياهم !!!
وقالوا كمان هو كم معاق قادر على امتلاك سيارة ولو كانت بنصف القيمة ؟؟؟ وقالوا لاتنسوا انه وضعنا لائحة تنفيذية فيها شروط مش أي معاق بسري عليه القرار ... قرار مغربل ألف مرة !!!!!!
نعيش ونوكل غيرها.....
سامحوني إذا ما عجبتكم اللغة وما تعتبروه مقال.... واعتبروه كلام بالمقهى يقال... وفشت خلق بتبكي عالحال...

سلامي الحار لجميع أحبتي بدنيا الوطن

أخوكم
محمود عمور
فلسطين – جنين
[email protected]