لافتات شعبية للشاعر:رزق البياري

لافتات شعبية
الشاعر رزق البياري
[email protected]

الشاعر رزق البياري


لافتات شعبية

1-
غزة في واد
والضفة في واد
خربوها وقعدوا على تلها
شلعو دنيها لا شلها
وعواد باع أرضو يا ولاد
على أونا
على تري
فتح المزاد
يلا كلو يمضي سنانو
ويفتح عينو
ويشمر عن الزناد
وعند بعند
فش حد أحسن من حد
إرخي بشد
خف بمد
مين مع
ومين ضد
والرملة بعدت عن اللد
كلو عامللي سوبر أجدع
من الكتع للمخلع
وهواتين في الراس بتوجع
طب إخلع وانا باخلع
والشراد تلتين المراجل
وشيل ماني شايل
افضيحتنا بجلاجل
فلفل فلافل
صبو الزيت عالنار
يا للعار عاللي صار
والشاط يفهمها عالطاير
والله يكون بعون العباد
ماللي زاد وعاد
قلبو على بطنو
يخرب مطنوا
ولا عبالو
كل البلاد
طب إنتو في واد
واحنا في واد
واللقا يوم اللقا
إبقوا قابلونا
والله يحيينا ويورينا
إيش آخرة التناحة
وكبر الراس
والعند والعناد

2 –
اتفاق ينطح اتفاق
واللي في القلب في القلب
والشاطر يخلط الاوراق
كلو كلام في سوق الكذب
وبوس لحى للصبح
والجرح هوه الجرح
لا وفق ولا وفاق
شركة وانفضت
طارت وف حجرك هدت
والعتب مرفوع
كلو في الممنوع
ونقنق النقاق
نق وساق
وساق على ساق
من العايق للعاق
كلو بيرق رقاق
وهات يا طرق وخناق
ولسة بيقولو اتفاق

3 –
وأخيرا اتفقنا
وخلصنا من الخناق
سحجنا ورقصنا
وقعنا الاتفاق
أكلنا وشربنا
ووزعنا الابتسامات
صرحنا واتتصورنا
واطلعنا عالفضائيات
شخلعنا واتشخلعنا
ووكلو بالمجان
رحنا ورجعنا
رجل هناك ورجل هان
واللي كان يا عم مرجان
ولى وكان
وخلص المولد يا إخوان
قبل ما نعلي الكتاب
اسمعنا الجواب
روحو الاحباب
كل واحد من باب
يا فرحة ما تمت
زي ما طلت فلت
والحسبة هالمرة
ما زبطت
والقسمة قلت
وما كفت
ما هوه كل إشي بالخناق
إلا الوفاق بالوفاق
واتفاق على فراق
والرك عالنية يا رفاق
العروس طلعت مش للعريس
والجري بس للمتاعيس
وساس سوس
وراس روس
كلو بدو هالفانوس
مادد بوزو للفلوس
طب السلامة غنيمة يا حليمة
ما باليد حيلة يا حجة اسليمه
وسلامات يا ستات
على هيك اتفاقيات
كلو عينو عالعنبات
وفي ديلو مخبي حكايات
ولسة بيقولو اتفاق
طب الثعلب اتثعلب
وفتل وفات

4 –
هدنة تنطح هدنة
واحنا زي ماحنا
مكانك سر
وكل مالنا لورا
إيش اللي صار
وايش اللي جرى
ما حدش فاهم إشي
بالمفتتشي
كلو بيخاف ما بيختشي
واللعبة فنة
وقني وأنا بقني
بالأخضر ولا بالبني
أصل الحكاية عنك وعني
اللي عندك عندي
خلينا نشوف لوين حتودي
من الحبتي
للأفندي
كلو بيهف وبيسف
أوزي على مندي
وهادا اللي أجاك وأجاني
واللي وراك وراني
وهدك وهدني
طب حط راسك بين الروس
ودوس يا فدعوس
أحسن بطولك حماوة الموس
وآه يا هدني
اللي كلها على دقنك ودقني

5 –
بصراحة
والصراحة راحة
يلا انطلع اللي تحت الطراحة
ونشوف من غير خوف
الحلوة والمالحة
ويلا انطحطح ورا الطايحة
ونشطح في التناحة
طب خمسة سياحة
إحنا ولاد اليوم
مش البارحة
والإشي مش محتاج فلاحة
الطايحة رايحة
والبلد سايحة وسارحة
والولد عينو عالجاية والرايحة
آخر كلاحة
أجا يشرب بل حزامو في الساحة
وطحطح وطاح
وطب في الخلق انطاحة
طب نحنح ناحة
حاحا مش تفاحة
بس بيكفي تناحة
الريحة من زمان فايحة
والحكاية صارت بتخزي
كلها تناحة بتناحة

6 –
إفرحو يا ولاد
سحجن يا بنات
وارقصن يا صبايا بالعبايات
أبو الهيات
جاب الديب من شنباتو
خدو وهاتو
انتصارات عالفضئيات
تعالو شوفو نهفاتو
تصريحات ومناكفات
وردح حموات للضرات
اللي استحو ماتوا
الله يكفيكو تناتو
والجايات أكتر من الرايحات
إفرحو يا ولاد وغنو عالشاشات
إملو الصورة ابتسمات
وسلامات يا عم فرحات
الجرح في الكف والقلب مليان بالأهات
والهم طايلنا عالطلعات والنزلات
القول ضايع في هيك ورطات
واللي كان فات ومات
طب يلا ردو ورايا وقولو
عواد وقع من طولو
شيلو معايا شيلو
يا خيبتي عاللي هللولو
ولسة بيقولو
إفرحو يا ولاد
ارقصن يا بنات
طب سلامات عهيك انتصارات
وبركاتك يا عمي بركات

7 –

كذب الكذبة وصدقها
وفي غيرو لزقها
شدشدها وحزقها
حندقها وزوقها
وزقها ليسوقها
طب زودها وفزلكها
لضمها وحبكها
شقعها ورقعها
ربها وزبطها
وبطبط بطبطها
نتف بطها
شالها وحطها
وهات اللي يقدر
يردها ويصدها
واللي كذب الكذبة
شواها وسلقها وعلى قبتو دلقها
يخرب مطنو
جن جنو
زي القنو
شن شنو
كسر سنو
وايش خيرك عنو
وهنو يا هنو
هوه منك
وانت منو
أبو الملش نشنش ورش
خشخش وخش
ومن غير إحم ولا دستور
عينك ما تشوف النور
أبو مريول
لبس الأفرهول
بالعرض والطول
الشالول شلشل شالول
دشدش ووش
وفشفش وفش
مصدق نفسو
من نفسو
نصب حالو ناطور
طب جار ومجرور
يابو بربور
إيش ما تعمل
وقد ما تلف وتدور
بتضلك في كل الأحوال مكسور
ودور يا بابور
وضلك ورا الكذاب لباب الدار
لا تشكشك ولا تحتار
اللي جرى صار وخلص
واللي ملص ملص
وخنس نعس وقنعس
وقني وانا باقني
شيل هالبلا عني
كلو شغال عسس
مصدق حالو
كذب الكذبة
وعلق في رقبتها جرس



8 – عزيزي شاليط
باط بيط
كلو مربوط بنفس الخيط
والحيط هيه الحيط
حكايتنا واحدة
والشدة مش نفس الشدة
واللي عندك مش عندي
بيضالك في القفص يا أفندي
وقدك مش قدي
ومين قدك يا سلام
تاكل وبتشرب وبتنام
زي الحمام
أجتك والراعي نايم
فرشولك البسطوالسلالم
كل سنة وانت سالم
ويا حسرة علينا
وعاللي جبناه بإيدينا
الهم طايلنا من ورا ومن قدام
وحالنا بدوش لا حكي ولا كلام
طب صحصح معايا
بلاش اتشيط يا عبيط
شاط شيط
من اللعبيط للهيط
شرط تشريط
التبليط تبليط
والشلوط هوه الشلوط
وعلقة تفوت ولا حد يموت
وابو التوت
جاي رايح مع الستوت
والحكاية صانجة مش راكبة
وبدها تزبيط

9 –

كل واحد عقلو براسو
بعرف خلاصو
الحكاية بدهاش شرح وتفصيل
من القصير للطويل
ومن الخفيف للدقيل
كلو مع الهوى بيميل
الحدق يفهم
والمعلم بيموت وهوه بتعلم
ومن غير منغمغم ونهمهم
اللي في القلب في القلب
وفاض وانكب
كلو يخلي بالو من كاسو
لاصو ولا هاصو
ساقو وداسو
اللي بزرع الشوك
بكرة بطلع في إديه ورجليه
ومن غير ليش ولا ليه
اللي بطلع عليك
مردود إليه
واللي بعجن الريح
بتصو لما تعميه
طب كل واحد عقلو براسو
وكلو برجع لأساسو

10 _

حدر بدر
اللي بتعور مش مني
كلو يحل عني
محدش عن إشي يسألني
هدي صابت وهدي خابت
وهدي كيف ما هدت طارت
طب مكنش اتعذر
إيش الخبر ؟
اللي انكسر انكسر
وأبو العريف
الحريف
في عز الخريف
أجا يكحلها عماها
قطع شرشها
عن عمها وخالها
وخلاها على حالها
المياس أبو نواس
داس ع الأساس
ماخدها بكبرة الاس
ومش هامو
وين تقع الفاس
همو عبطنو
وهيك بيقول رطنو
طب يا ناس
الدبح في الميت حرام
والوضع مش ناقصو الطام
والحكاية مش يا طاب
يا اتنين عور
اللعب هالمرة
مع النحلة والدبور
ودور يا بابور
كلو يصف في الطابور
مرحب صفي مرحب صفي
كلو بدو زفه
ولحد هين وبكفي
واللي بنزل دمو
مش مني يابا
وآه يابو الغلابا
عالميجنا والعتابا

11 _

شيل الهيش
تك الخيش
اعشيش عشعش تعشيش
طلعت روحو من التلطيش
كشكش تكشيش
وكلو على مفيش
طب خرابش للحرافيش
الشاويش بدو بخشيش
والهبيش سحب الفيش
الدراويش لبسو الطرابيش
وقمروا عقفاك العيش
يابو العيش
ومتسألنيش لا كيف
ولا عشان إبش ؟؟!
كلمتين أبرك من ميه
حاميها حراميها
وتحية للسلبطاوية
كلو بيعوم عشبر مية
وعند الجد بيحك راسو
وبيعوج الطاقية
والعملية على هيك منهية
اللقمة مقسومة
غزة حكومة
ورام الله
حكومة
سياسة مرسومة
ومتقليش القصة
مش مفهومة
ومريم مريومي
قومي معايا عومي
وكيف ما بدك لومي
اللعبة ملغومة
كلو بجري يكبر كومو
محدش مدور لا عكومك
ولا كومي
كلو في الممنوع
ومش ميه الميه
الغلطة مش فنية
والرك مش عالنية
وحلق حوش
يا ملطوش
قراقوش قرقش الطبلية
قش النية قبل المستوية
عوج الطربوش
ودلى لسانو للبقية
طب تعال اتخبى في عبي
يا عنية

12 _

لا تعايرني ولا أعايرك
لا تسايرني ولا أسايك
" ليفني " لفت دايرك
فضحت رمايمك
بين المستخبي
وانكشف المستور
بيكفي اتلف وتدور
سوق الشهامة جبر
واتدلعو الغجر
طب مكنش انجبر يا قطر
خالف تعرف
بالطبلة والدف
الأمر بدو إعادة نظر
واللي اعتذر اعتذر يا ناس
دايما عكس اعكاس
كلو جاي عالهدا
أنا وانت في الهوى سوى
فش حدا أحسن من حدا
واللي بيكبر حجرو
بينقصف عمرو
وف عز الضهر الحمرا
بيندور
ومرة على مرة
قطرة ورا قطرة
قطران يا قطر
طب مكنش اتعذ
ولا طبش راسو بالحجر