الفيديو كليب بقلم: فايز عمر بديع

الفيديو كليب

عن موضوع الفن العربي

صرح مصدر غير مسؤول

إن الفن اتأخر جداًُ

والأستاذ فايز بيقول

إن الشعب العربي عموماًُ

من مصلحته يعيش في ذهول

حيث الفن الكامن طيه

كله رقع وهز طبول

تسمع لحن كله سوارس

والكلمات لصحاب العجول

تطول ودنك تتخن راسك

تسمن جداًُ تبقى مهوول

حيث الفن الحالي بتاعنا

كله واصل على موصول

الواد الجن اللي اسمه الأسمر

فكرة وجاية من متوول

وسي بتشان اللي مولعها

ناره نعوزها تسخن فول

وسي متقال أبو حس فراولة

سيطه موصل لاسطنبول

والمحروس إيشي عمرو ذئاب

ماله مغطي على مسؤول

كله يغني فيديو كلاب

كله يغني مهما تقول

والفنان في الشاشة مذبذب

يطلع ينزل مش معدول

مرة يغني لابس كاب

ومرة عامل فيها مهبول

أما الفن الراقي عموماً

حاجة تخلي العقل يصول

تسمع لحن تعيش في خيال

والكلمة تخليك مسؤول

واحدة تقول دارت الأيام

والتاني يدندن جندول

ديه نصيحة يا شعب يا طيب

تعمل بيها تعيش على طول

ما تعمل بيها دمك يغلي

يرفع ضغطك... تجري تبول

بقلم: فايز عمر بديع