رسالة من عاشق إلى معشوقته خلف الحصار شعر:راسبوتين بن صابر

باللهجه البسيطه مع إستخدام مصطلحات من واقع الحال..

رسالة غرام من عاشق لمحبوبته وسط لحصار

احلى صباح ،،

كيف حالك يا ورده؟

بل يا احلى من ورد المزهريه

لا..

احلى من عروس البحر

اجمل من حوريه

خططت اجي لعندك بس :

إلإجتياح اخرني شويه

لو بقدر اهجم ع حسنك

كنت لعندك جيت بدوريه

حبك الاجدر، لفك الطوق، ولرفع المعنويه

زمن بيمضي

وإن كنت عندي بقربي

مش ليً.

ومع هيك ما عدت اطيق

غرام وبريق

حاجز عالطريق

في قلبي حريق حني عليً...

بحبك:

نبض قلبي صار

اسرع من زخ الرصاص

وحبك بهالقلب اقوى من خبط المدفعية.

لو حطوا حاجز طيار؟؟

رفعوا في طريقي جدار؟؟

في البلد منعوا التجوال؟؟

سأمشي لعندك مشوار

حتى لو بركب حمار

أمشي بالوعر جوال

وأسلم لك المرسال

مع قبله من قلبي

يا نور حبي يا سحر الجمال

قلبي إليك مال

وما تغيرت مشاعري وحبك:

إستوطن فيِّ

إلى اللقاء.. اشوفك بعد فك الاغلاق

.ما تنسحبي من طرف واحد

شوفي بالأول رسالتي وردي عليِّ


لك احلى كلام

تمنياتي ليومك يمشي عالتمام ، ومن قلبي لقلبك محبه

ومن روحي لروحك سلام.

بإخلاص :المرسل راسبوتين

المرسل اليه :فلسطين