زرع البحر

متحملة المواويل عيدان
تفتح ف راس الأرض حشّه من الدهب
مسكة إيدين العرقانين
تقلب سواقى الدُر تبدر حَبها
تطرح عيال ...
مش من عيالها ...
ما كانوش عرايس الطين بتنفخ روحها جواهم
*****
يبعتر الفجر الندا من قلب قلبى
وشمسه البدرية تمله ... وشيلة طرف الجلبيه
متبشلله عيون الولاد على صدرها
تحرَن مواشى الساقيه ع الجسر ألا تشرب
فى اللبصه بتخطى الخطاوى
تغرس تقاوى الضل ع الناحيه
*****
عايش بحس التوته ... والحواديت
وألف ألف خريف مسافر ع الشطوط ... ويا الفلايك
جى من جوه البلاد ...
ولحد قلبها واتقسمت
غية حمام تعرفنى جى منين وهاجج
تغرق حلاوة المشى فى الحنه الشراقى
بالخضرة تتوضى ...
ساعة المغارب ...
لما تستغرب من الوز اللى سايب
ما تخافش ... خطى ...
وخد حفان م البحر ...
ـــــــــــــــــــــــــــــــــــــــ
زوروا موقعى على الانترنت رابط :
http:hosamansora.blogspot.com