الست عدلات .. أم الحكايات بقلم حنان عاشقة سيدي

الست عدلات اقدم موظفة في المحافظة شعبة الضرائب، ربنا يجعل كلامنا خفيف عليهم ..
سيدة ناهزت من العمر أواخر العقد الرابع ، بس عيئة في نفسها .. البونيه على راسها لا يمنع خصلتين إلي الصبغة لسة محلياهم من الظهور للشعب.. مكتنزة بكل معنى الإكتناز تعرفها من آخر الممر .. لا تدني نفسها لتقف في طابور الموظفين السخيف لتوقع حضور و انصراف.. الدفتر بيجي لحد عندها علشان تأشر بس عليه ..
رضا الست عدلات واجب مقدس لكل الموظفين سواء في القسم أو في البوفيه !! لأسباب كانت تغيب عني للأسف و لكنها واضحة وضوح الشمس للسادة الموظفين .. الست عدلات تقرب للسيد النائب بتاع بلادنا .. و جوزها سي عبد السميع صاحب اكبر عطارة في البلد .. و لجدها مقام زي مقام سيدي العريان كده ..

كوكب تاني الست دي .. ليها في كل بيت فتوى و كل قسم ليها إتاوة عليه .. و كنت انا المغفلة الوحيدة إلي مش فاهمة كل ده .. عمري ما شوفت لها ملف على المكتب ولا كيس خضار تطقطق فيه شوية فاصوليا لغذاء العيال في البيت ولا يرهقها ساعات الدوام الرسمي.. هي ست نشيطة رغم عامل السن إلي يخاف يقرب منها و الكل يشهد انها ست الستات.. و أصبا من أي بنت في المحافظة كلها .. كفاية خفة دمها ربنا يرحمنا !! و يا بخت مين كان ال......خاله!!
كان ناقص نشوف على مكتبها بخور و عيدان من الشموع ..و مكان لتقديم القرابين فيه!! الكل عارف أنها ست بركة و لعنة في نفس الوقت و رغم سمارها القاتم إلى أن الكل يشهد بنور دخلتها عليهم ( زارنا النبي!!)

تعرف حكاية اعتماد و جوزها .. و مشكلة فتحي مع مراته بسبب جارته.. و تعرف حل عقدة البت الصدمانه العدمانة هدى إلي هيفوتها قطر الجواز و كرامتها كثير و ليها بزنس كارت كفاية إن عليه اسمها و رقم المحمول بتاعها للفتاوي حاجة كده زي 0900 ...

ما بيخلاش مكتبها من طبق حلو عملاة الست نفوسة أو (نفيسة ) علشان تاخد رأي الست عدلات في مشكلة عويصة مع جوزها المبصبصاتي !! و الإفطار بطرقة جديدة للكلوب ساندويش من الست أم ناهد علشان تتفنن كده و تفتيها فتوى عن خطيبها الي مش عاوز يتمم الخطوبة إلي طولت دي ..

طبعا الحاجة الساقعة كانز مش قزازة !! و أكيد دايت.. الشاي ..الشاي بالزعفران ده مخصوص من برطمان الست و يا سيدي على الشاي بالياسمين ... لأنها عملة رجيم!!رغم اكتنازه كل ما هو فيها بدأ من شفتيها مصبوبا إلى ذراعيها و يزاحم الخواتم في أصابعها السمان..حتى الكرسي الغلبان اشتكى و لكن في صمت لأنها بتقعد عليه و يلزمها عليه شبرين كمان !!و النبي غلبان بس الصبر ..و الكل شايفها غزال !!

منذ اللحظة الأولى التي وقعت عين الست عدلات علي و هي تبحث عن شيء ما في رأسي أو حلقي أو قدمي ؟؟ شيء ما لا اعرف ما هو لأعطيها إياه لترحمني من لعنة الملفات التي ترهق أناملي و عيوني ..

هي امرأة لا ينضب فمها من الحكايات ولا يكل لسانها ولا يمل من الحواديت ..و لكن شيء ما يجعل من الست عدلات هالة يخشاها الآخرون .. بالون هي فقط بالون أو حسب قانون المساحة منطاد .. لا يحوي بداخله سوى الفراغ ( فراغ عقولنا)!!

كل ما يدور في هذا المنطاد حكايات يجعل منها ست الحكايات لكل موقف يمر عليها حكاية و عبرة و موقف..

على فكرة الست عدلات مش بس منطاد دي كمان ساعات بتكون زي البراشوت !! تسقط عليك و على أفكارك و على انجازاتك و أي حاجة ممكن تكون حلوة أو تستحلاها هي حتى لو كانت سندوتشاتك !!
و أنا و أنت لا حيلة لنا سوى ابتسامة بلهاء و هي نتقد على عقلك و لسانك و تلافيف أمعائك لأننا نتقي شر غضبها !!

تلك السيدة غيرت معاني كثير لمفهومي اللغة العربية !!
فهي مصيبة في نصائحها !!! بالنسبة لي هي مصيبة فعلا ( كارثة يعني)
و في المواقف تقف موقف القاضية !! يعني بالنسبة لي هي قاضية فعلا ( بتخلص من الآخر بتقضي على صاحب المشكلة نفسها بمشكلة تانيا)
و في الحل المواقف داهية !! يعني داهية بجد إلى على من رحم ربي!!
و رغم تآمري أنا و فضولي لنعرف سر هذا المنطاد و لكن....!!

اكتشفت ان في حياتنا الكثير من المناطيد و البرشوتات يكسوا حياتنا بلا مبررات ولا أسباب ..
nano_tamtam@yahoo.com