بنت

ضلمه ونور
ضلمه ونور
ضلمه وضلمه وضلمه
بنت
قربتها منى فِرحت
ضميتها
طِلعت لفوق
بعد الروح بمسافه
زدت ف ضمها
النهدين ارتعشوا
ونقشوا ملابسى
بياض
دفيوا
أصبحوا نار
شعرها
ليل نعسان
بيغرق كل صوابعى الرعشانه
أضمها تانى
اللبن اتحجر فيَّ
تاخد الحلمه ف بقها
تشرب
تنعس
تسحب بقها
وتنام
قبل ساعات الليل ما تفر
صدرى يشكشك
دبابيس إبر
دبابيس إبر
تصحى
تعيط
ترضع
تنعس تانى
ورق النتيجة عد
العامين كاملين
غمّست الحلمه
بصبار
خطفتها ببقها
شفطت
انفجرت باكيه
ضمتها لصدرى
تمسح بدماغها هدومى
وتحاول ترضع
تتلسوع مر اللبن
أبعدها بعيد عن جسمى
أبكى
تبكى
أبكى
* * *
ضلمه ونور
ضلمه ونور
ضلمه ضلمه وضلمه
بنت
* * *
شجر الحنه يجرّح إيدى
وأقرطف أوراقها
واكوّم اكوّم
يا حنه يا حنه يا حلم الفتى
بديلك بنيه يا عينى وفطامى ابتدا
* * *
عَجَنِتْ الحنه باديا
فَرَشِت الحنه ف اديكى
ربطت اديكى واقدامك
دهنت عنيه بالفرحه
لسه اللبن نازل
يلسوع ف ورق الورد
طلع الصباح
ما طلعش
حُطوا العشا ف الأسبته
حُطوا الحمام ويا الكبد
حُطى كيس البرسيم ف هدومك
ادخلى بالرجل اليمنى
جوزك .. جوزك
اتمخطرى يا حلوه يا زينه
يا ورده من جوا جنينه
يا عود وغصنه بينده له
* * *
مسكوها بقوة
وشدوها
صوابعها معلمه ف اديا
وكتفى
اتمخطرى يا حلوه يا زينه
صدرى عمال بيشر
أبيض
لون الزفاف
أبيض
لون الكفن
طالعه السلالم يا مشا الله عليها
بنتى وحبيبتى والفطام ف عنيها
سك البيبان على حسها
والنور طفى
* * *
- مبروك
- عقبال عوضها
وتشيليه
لما قالوا دى بنيه
قلت خير ونور عليَّ
وجابوا لى الشبكه شَبَكَه
وقالوا يا ام الصبيه