الوطن المحتل و الممنوع و المسموح شعر:ابو الحب

آخر الأخبار

نسخة الهواتف المحمولة

القائمة الرئيسية

تاريخ النشر : 2008-07-20

القراءة : 694

الممنوع و المسموح

الممنوع

لازم نـــــبدا بالممــــــــنوع
حتى نعرف شو الموضوع
بيني و بيـــــنك خلي السر
لسانك من تمك مقــــــلوع

ممنـــوع تسأل كيف أحوال الدني
و ممنوع يدخل بيتك شـــــــوية غلال
ممنوع تحكي ع خيانه و خيخني
و ممنوع نحنا نقــــــول عــنا احتلال

ممنوع تتشكى لربــك عل اليــهود
هودي "شعب مختار" ما عندو نفاق
ممنوع تتذكر من الحاكم وعـــود
و ممنوع تحكي عالخيـــــــانه باتفاق

ممنوع تحكي ضد أمريكا كــــــلام
وضد اللي باع الأرض ممنوع الحكي
ممنوع أنت تعارض حلول السلام
و ممنوع من جيش الأعــادي تشتكي

و ممنوع ضد المعتدي تظهر ملام
و ممنوع قـــــــــــــرآن الأمين اليعربي
ممنوع ما تظهر محـــــبة وابتسام
ممنوع تحكي بأرض أو عرض و سبي

ممنوع تحكي عن مجاعه أو محن
ممنوع تحكي بمي أو نهــــــــر انسرق
ممنوع تستشهد على تراب الوطن
ممنوع تكـتب (آخ) على شــــقفة ورق
======

فهمنا لكن شــو المسموح
فهمني قـــــبل ما تـــــروح
الله يزيدك عــــــــلم و فهم
و تبقى بالخيمه مبطـــوح

المسموح

و سألت شو مسموح عنا بهالزمان
مسموح تضحــــــــك للوزير و شلتو
مسموح تسكـــــت كل ما آن الأوان
و مسموح تنسى هالمريض و علتو

مسموح انو يكون ما عــــندك خجل
مسموح تقليد الغرب و ســــــياستو
مسموح تتعلم أســـــــــــاليب الدجل
و للحــــــــــمار تشلحــــــو مخلايتو

مسموح تهتف للحكومه كل يـــــوم
و تعمي عيونك عن فساد و ابتزاز
مسموح ع حـــــالك اذا حطيت لوم
مسموح عقلك لو أنصاب باهتزاز

مسموح انو تكـــون عبـــد الأجنبي
و تنسى شعب مقهور تحت الاحتلال
مسموح انت تكون ببــلادك غــــبي
مسموح تنسى كل ما عـــــندك آمال

مسموح تظهر لليهودي انحـــياز
مسموح تنسى ارض معراج النبي
مسموح تاخــــذ بالجهاله امتياز
مسموح تحـــــرق كل كتب المكتبي

مسموح ما تصلي على قـــــــبلة عمر
صلي على قبلة(كــوهين) بتل أبيب
مسموح ما ترمي على الأعــــدا حجر
مسموح عن أطفالنا يغيب الحليب

متصفحك لا يدعم الجافاسكربت أو أنها غير مفعلة ، لذا لن تتمكن من استخدام التعليقات وبعض الخيارات الأخرى ما لم تقم بتفعيله.

خيارات