أصلبْ طُولكْ ... شعر: رفعت المرصفى

أصْلُبْ طولكْ ... قصيدة لـ رفعت المرصفى
---------------------------------------

أصلُبْ طولكْ ...

حوّطْ على حلمكْ من تانى

حُطه فـ حُضنكْ زى زمان

واتعكّزْ على طيبةْ قلبكْ ... واتحمّلْ

عارفينكْ.....من يومك

وأنت أمير على كل الأوجاع

من يومك ... وانت بتركبْ وجعكْ زى حصان حرنان

ولجامه ملفوف على إيدك ...

من يومكْ...

وانت بتفردْ جلدكْ لمشاعركْ ...

وتنام على ورق الملحْ ... وتغنّى

من يومكْ ,,,

وانت بتحضُنْ فجركْ وتبوح

وترشرشْ حلمكْ فـ عيون الصُّبحْ

من يومكْ ...

والصبر متبِّتْ فــ ضلوعكْ

ومقويكْ ... ومخليكْ زى ضلوع البحـر

ديما تتحمّلْ

عارفينكْ

عُمركْ مااتوجعتْ بصوت

عُمركْ مااديتْ ودنكْ للأوجاع

ولا عُمركْ تُهت فـ يوم واتهزيت

ولا عُمركْ خفت فـ يوم من ريحة الموت

من يومكْ

والصبر متبّتْ فــ ضلوعكْ

ومقوّيكْ ... ومخليكْ

زى ضلوع البحـر

ديما تتحمّلْ