ثورة مضادة شعر أبوزيد بيومي

ثورة مضادة
أبو زيد بيومي
( 1 )
عسكر يسكر
يضرب نار
برضه يفوق .... وبيضرب نار
كنت انا كدا كدا
ميّت بينهم
رحت مْغَيّر جلدي بسرعة
وعملت إنّ انا واحد منهم

( 2 )
المسجون المخلص جدا
للزنزانة
كان إخلاصه
بيملا كيانه للترقوة
المفاتيح جاتله برجليها
... هيّ ..... هو ّ .....
خَدها فْ حضنه
لكن قَفَل الباب من جوّة

( 3 )
عايش عمرك
ع الأحلام
طب ليه تصحَى ؟
ارجع تاني ...
اتعرّى ونام

( 4 )
توب العَدل
دا شيء مخصوص
لو ما يـجيش التوب ف مقاسك
راح تفضل على طول ...
... بلبوص
( 5 )
لما العجز
بسجنه يحوزك
سقف نفوذك .....يفضل دايما
في التكشيرة
...... و لَوْية بوزك

( 6)
ليه تتعرّض للمماليك
وانت مفيش
ولا واحد منّك
وانت مفيش
ولا واحد ليك

( 7 )
في البلكون
الطالل خالص
عَ الـمَيْدان
وقف الطاغية
كان مستنّي
يِدّي نيشان
للفرقة الباغية

( 8 )
وسط السوق ....
بين الناس
حابل .... نابل
والنخاس
بالكرباج بيسوق ف عبيده
شدت إيده
سلسلة فيها عبد وجارية
و فْ سلسلة تانية الإحساس




( 9 )
رغم سقوط
أحكام السادة
فِضِل العبد
بيركع ليهم ..........

حكم الطبع ....
..... حكم العادة


( 10 )
ولا كان ليها
أي لزوم
لمّا تكون مربوط
فِ سلاسل
إنّك يابن الكلب ... تزوم

( 11 )
موت دلوقتي
ليه تستنّى يـجيلك بُكرة
فاتك آخر قطر
.... خلاص
و وصولك
راح يفضل فكرة


( 12 )
آخر حاجة
يطولها العاجز
كلمة يمكن
كلمة جايز