رعشة أنين بقلم الشاعر حسام العقدة

رعشة أنين
ماليه الإيدين
سهر الدقايق فى العينين
كون السكات ...
روح الحاجات ...
لون الآهات لحد فين
مين اللى مختار لى الهدايا
مين اللى فى عينين المرايا
ومعدش فاضل للعطش
إلا السنين ...
لحد فين
صدى المكان
ضحك الزمان
وخوف يدَّوب فى الأمان
طعم السهر
صمت الصور
نبض الحنين ... لحد فين
وانتى اللى راحت من سنين
ولا انتى بكره الفرحانين
ولا الهوان ...
إللى فى هواه هانسى اللى كان
ولا انتى مين .