المكالمة الضاحكة (18) بقلم سحر فوزى

ألو....أزيك يابنى...عامل ايه فى غربتك... كل شئ هنا تمام ..و(ابليس) واولاده شايفين شغلهم على الآخر...مش كده و بس... دول طوروا (الوسوسه)..لما خلوا الدنيا مش عايزة تهدأ أبدا....وده واضح فى تصرفات الناس اللى قالوا عايزين انتخابات علشان نقول رأينا بحرية ...ولما بدأت النتيجة تظهر أعترضوا لان النتيجة مش هى...طيب ماهى اصواتكم واختياراتكم هى اللى وصلتنا للنتيجة دية...ده غير الخناقات كل يوم اللى بقت تنتهى بالقتل....والسرقة بالاكراه بدل النشل ...والسطو المسلح بدل أخد القروض و(الكت)...ده غير انهم خلوا الناس تشك فى بعضها ...والكل بيفكر بنظرية المؤامرة....لما الشعب اتقسم لطوائف وفئات ....شوية فلول ...وشوية تيارات دينية....وشوية قوى سياسية...وشوية اتباع الطريقة الفلانية...وشوية من انصار الشيخ ابو طاقية....وشوية ولا تبع دية ولا ديه... واهو فى النهاية كلهم بيتهموا بعض انهم مزورين وحرامية....وأبليس مسلطهم دلوقت على الازواج والزوجات لما خلوا الخلع والطلاق اسهل من عمل شوية ملوخية...ده غير المشاجرات الحامية اللى خلت الأب يدبح مراته وعياله علشان الغيرة والشك والحكاية اللى مش هى....او يشترى كام تعبان يحطهم لبناته فى فرشهم علشان مش عارف هم ولاده والا زوجته كانت بغيه ....ده غير ان اصغر عيل بقى لسانه اطول من الايام السودا اللى احنا عايشينها ديه ....ويرد عليك وممكن يهزقك كأنك بتلعب معاه عسكر وحرامية....والعقوق اللى خلى الام والاب خدامين عند أولادهم وفى النهاية الولد يطردهم علشان مراته تقعد مكانهم وتجيب له الخلفة اللى هى....اما الكدب والحلفان والنفاق بقوا اسهل طريقة للخلاص من المشاكل والوصول الى المناصب القيادية...والفضائيات خلت الناس تصلى بين الفواصل الاعلانية... لاحسن يفوتها الماتش ...ولا حته من المسلسلات التركية...واهو محدش طايق لحد كلمة والكل بيتلكك علشان يبين عضلاته اللى كانت مستخبية....وأدينى بأقعد أبص على اللى بيحصل وأقول لو الناس أشتغلوا واتقنوا شغلهم زى ابليس واولاده كان حالنا اتغيروماكناش بقينا فرجة للبلاد الاجنبية... معلش انا حاقفل معاك دلوقت اصل امك ماسكه فى خناق واحدة من الجيران وعايزة تخنقها وولاد الابالسه( بيوسوسوا لى) انى اما اطلقها او اقتلها وفى الغالب حاقتلها واخلص من مشاكلها ومن لعبهم فى ودانى كل شوية؟!!!ولاد الابالسه اهم / بقلم سحر فوزى/كاتبةوقاصة مصرية26/5/2012