وشوش الشاعر حسام العقدة

وشوش

حبه وشوش ماشيه على سحاب السما
ووشوش تحوش اللقمه فى الضله
ووشوش تخطى الخطوه ...
محتاره ... على التانيه
ووشوش شراقى
ملاقى نقطه ميه فى أركانها
ووشوش بتهرب من وشوش الأرض ...
فى الخطوه غريقه ف زحمة العتمه
وناس لزقه عيون وزعيق على وشوشها
وناس تدارى وشوشها ... ف وشوشها ...
تعيط عللى جاى ...
ووشوش يبوش لونها ويتلخبط فى لوحه
ووشوش تشابى على القمر ...
نورها الحوارى الضيَّقه
ووشوش مع رماد السجاره ملألأه ... وقعه
ووشوش على فروع الشجر متعلقه ...
بعد الخريف
ووشوش تدوس ع الفجر ...
وتخبى ... عودين كبريت فى فستانها
ووشوش سنين ... مسجونه فى سطور الورق
ورتوش وشوش عايمه ... على الميه
وللأسف ... شايف وشوشهم كلها
لكن ملامح وشى أنا ... !!
....
زوروا موقعى على الانترنت رابط : http://hosamansora.blogspot.com